तुळजापूर शहरातील एमडी ड्रग्ज प्रकरणातील प्रमुख आरोपी, विनोद उर्फ पिंटू गंगणे याच्या पोलीस कोठडीची सहा दिवसांची मुदत आज संपली. यानंतर त्याला धाराशिव जिल्हा व सत्र न्यायालयात न्यायाधीश श्रीमती मिटकरी यांच्यासमोर हजर करण्यात आले असता, न्यायालयाने त्याची रवानगी न्यायालयीन कोठडीत केली आहे.
आज झालेल्या सुनावणीदरम्यान अनेक नाट्यमय घडामोडी घडल्या. आरोपी गंगणे याच्या वकिलांनी त्याच्या प्रकृती अस्वास्थ्याचे कारण देत जामिनासाठी अर्ज दाखल केला. गंगणे याला किडनी, छाती आणि पोटदुखीचा त्रास होत असून, दोन दिवसांपूर्वी त्याला उपचारासाठी तुळजापूर उपजिल्हा रुग्णालयात दाखल करण्यात आले होते, असे न्यायालयात सांगण्यात आले.
याच वैद्यकीय कारणांचा दाखला देत पोलिसांनी आज गंगणेच्या पोलीस कोठडीत वाढ करण्याची मागणी केली नाही. मात्र, गरज भासल्यास पुन्हा पोलीस कोठडी मागण्याच्या अटीवर त्याला तात्पुरती न्यायालयीन कोठडी (MCR) देण्याची विनंती केली. पोलिसांच्या या भूमिकेमुळे आरोपीला वाचवण्याचा प्रयत्न होत असल्याच्या आरोपाला पुन्हा एकदा बळ मिळाले आहे.
सरकारी वकील ॲड. जयंत देशमुख यांनी सरकारच्या वतीने जोरदार युक्तिवाद केला. न्यायालयाने दोन्ही बाजूंचे म्हणणे ऐकून घेतल्याशिवाय जामीन अर्जावर निर्णय देता येणार नाही, असे स्पष्ट केले आहे.
विशेष म्हणजे, याच पिंटू गंगणे याने या प्रकरणात ‘गोपनीय बातमीदार’ म्हणून पोलिसांना मदत केल्याचे फिर्यादी, सहाय्यक पोलीस निरीक्षक सुदर्शन कासार, यांनी आपल्या जबाबात म्हटले होते, गंगणे याने व्यसनातून बाहेर पडून इतर तरुणांना वाचवण्यासाठी पोलिसांना मदत करत असल्याचेही सांगितले होते. मात्र, आता तोच या प्रकरणातील प्रमुख आरोपी बनल्याने आणि पोलीस त्याच्या कोठडीसाठी आग्रही नसल्याने संपूर्ण प्रकरणाच्या तपासावर गंभीर प्रश्नचिन्ह निर्माण झाले आहे.
