धाराशिव: ढोकी शिवारात चार दिवसांपूर्वी आढळलेल्या जळीत मृतदेहाचे गूढ अखेर उकलले असून, हे प्रकरण अत्यंत धक्कादायक वळणावर पोहोचले आहे. मयत महिलेचे नाव राणी गायकवाड (वय २६) असे असून, तिचा खून तिचाच प्रियकर अनिकेत महादेव कांबळे (वय ३३) याने केल्याचे पोलीस तपासात निष्पन्न झाले आहे. दोघेही विवाहित असताना लग्नासाठी आणि सोबत राहण्यासाठी राणीने लावलेला तगादा तिच्या जीवावर बेतला.
‘तुझ्यासोबतच राहायचंय’ हा हट्ट ठरला जीवघेणा
पोलिसांनी दिलेल्या माहितीनुसार, मयत राणी आणि आरोपी अनिकेत हे दोघेही विवाहित असून त्यांना मुलेही आहेत. मात्र, त्यांच्यात प्रेमसंबंध निर्माण झाले होते. राणीच्या घरी या प्रकरणाची कुणकुण लागल्याने तिने पतीपासून विभक्त होऊन अनिकेतसोबतच राहण्याचा आणि लग्नाचा हट्ट धरला होता. मात्र, अनिकेतला हे मान्य नव्हते. राणीच्या या सततच्या तगाद्याला अनिकेत कंटाळला होता आणि त्यातूनच त्याने तिच्या कायमच्या बंदोबस्ताचा भयावह कट रचला.
थरारक घटनाक्रम: पुण्यातून अपहरण ते ढोकीत अंत
२६ नोव्हेंबर रोजी अनिकेतने राणीला फिरण्याच्या बहाण्याने गाडीत बोलावले. प्रवासादरम्यान दोघांमध्ये लग्नावरून पुन्हा कडाक्याचे भांडण झाले. यावेळी राणीचा काटा काढण्याचे ठरवूनच आलेल्या अनिकेतने तिची समजूत काढण्याचा बहाणा करत, “तुला माझ्या गावी घेऊन जातो,” असे सांगून गाडी पुणे सोडून सोलापूर-धाराशिव मार्गावर वळवली.
२७ नोव्हेंबरच्या पहाटे गाडी धाराशिव जिल्ह्यातील ढोकी शिवारात पोहोचली. प्रवासाने थकून राणी गाडीतच झोपली होती. हीच संधी साधत नराधम अनिकेतने झोपेतच तिचा गळा दाबून खून केला. तरीही मन शांत न झाल्याने त्याने लोखंडी रॉडने तिच्यावर वार केले. त्यानंतर आपली ओळख पटू नये म्हणून पेट्रोल ओतून मृतदेह जाळला आणि तो तिथून पसार झाला.
तांत्रिक तपासाने आरोपी जाळ्यात
इकडे २६ नोव्हेंबरपासून राणी बेपत्ता असल्याने तिच्या घरच्यांनी वाकड पोलीस ठाण्यात (पुणे) तक्रार दाखल केली होती. वाकड पोलिसांनी तांत्रिक विश्लेषण (CDR आणि मोबाईल लोकेशन) केले असता, राणी सतत अनिकेतच्या संपर्कात असल्याचे आढळले. पोलिसांनी अनिकेतला ताब्यात घेतले. सुरुवातीला त्याने उडवाउडवीची उत्तरे दिली, परंतु पोलिसांनी तांत्रिक पुरावे समोर मांडताच त्याने गुन्ह्याची कबुली दिली.
वाकड पोलिसांनी आरोपीला अटक केली असून, त्याच्यावर खून करणे आणि पुरावा नष्ट करणे या कलमांखाली गुन्हा दाखल करण्यात आला आहे.
