वाशी – केवळ ट्रॅक्टरचा हॉर्न का वाजवला, असे विचारल्याच्या क्षुल्लक कारणावरून एका कुटुंबातील सदस्यांवर जीवे ठार मारण्याच्या उद्देशाने लोखंडी कुऱ्हाड आणि सळईने हल्ला केल्याची धक्कादायक घटना धाराशिव जिल्ह्यातील वाशी तालुक्यातील सोनेगाव येथे घडली आहे. या हल्ल्यात कुटुंबातील महिला, पुरुष आणि लहान मुलगी जखमी झाले आहेत. पीडित महिलेच्या तक्रारीवरून वाशी पोलिसांनी १३ आरोपींविरुद्ध गंभीर स्वरूपाचे गुन्हे दाखल केले आहेत. ही घटना ३ मे २०२५ रोजी रात्री घडली असून, याबाबत ८ मे रोजी फिर्याद देण्यात आली.
पोलिसांकडून मिळालेल्या माहितीनुसार, सोनेगाव येथील रहिवासी असलेल्या सुनिता दत्तू सुरवसे (वय ५५) यांनी ही फिर्याद दिली आहे. ३ मे २०२५ रोजी रात्री सुमारे ९ वाजण्याच्या सुमारास त्यांच्या घरातील गायीच्या गोठ्यासमोरून आरोपी ट्रॅक्टर घेऊन जात असताना हॉर्न वाजवला. याबाबत सुनिता सुरवसे, त्यांचे पती दत्तू सुरवसे, मुलगा समाधान सुरवसे यांनी विचारणा केली असता, आरोपी हरीचंद्र मोहन कोळकर, मोहन आप्पा कोळकर, हरीभाऊ ज्ञानोबा कोळकर, बिभीषण ज्ञानोबा कोळकर, ज्ञानोबा आप्पा कोळकर यांच्यासह बारकाबाई मोहन कोळकर, शांताबाई हरिश्चंद्र कोळकर, शिवकन्या हरीभाऊ कोळकर, उज्वला ज्ञानोबा कोळकर तसेच संकेत संजय कांबळे, बालाजी संजय कांबळे व इतर दोन अशा एकूण १३ जणांनी गैरकायदेशीर जमाव जमवला.
आरोपींनी फिर्यादी सुनिता सुरवसे, त्यांचे पती, मुलगा आणि नात प्रीती अमोल सुरवसे यांना जीवे ठार मारण्याच्या उद्देशाने शिवीगाळ करत लाथाबुक्क्यांनी, लोखंडी कुऱ्हाडीने व लोखंडी सळईने जबर मारहाण करून गंभीर जखमी केले. तसेच, जीवे ठार मारण्याची धमकीही दिली.
याप्रकरणी सुनिता सुरवसे यांनी ८ मे २०२५ रोजी वाशी पोलीस ठाण्यात दिलेल्या प्रथम खबरेवरून, पोलिसांनी सर्व १३ आरोपींविरुद्ध भारतीय न्याय संहितेच्या कलम १०९ (गुन्ह्यास मदत करणे/प्रवृत्त करणे), ११८(१) (गैरकायदेशीर जमाव), ११५(२) (जीवघेणा हल्ला करून दुखापत करणे), १८९(२), १९१(२), १९१(३) (दंगल घडवणे/सदस्य असणे), १९० (धमकी देणे), ३५२ (गंभीर दुखापत करणे), ३५१(२), ३५१(३) (मारहाण) अन्वये गुन्हा नोंदवला आहे. या घटनेमुळे सोनेगाव परिसरात तणावाचे वातावरण असून, पोलीस पुढील तपास करत आहेत.
