अहो मंडळी, अखेर तो दिवस उजाडला! ज्या निवडणुकीची वाट पाहून पाहून डोळे पांढरे झाले, राजकीय कार्यकर्त्यांच्या मिश्या तोंडावर आल्या (आणि काहींच्या गेल्याही असतील!), त्या स्थानिक स्वराज्य संस्थांच्या निवडणुकांना सुप्रीम कोर्टाने हिरवा कंदील दाखवला आहे, तोही थेट ओबीसी आरक्षणासह! म्हणजे आता नुसता धुरळा नाही, तर राजकीय फटाक्यांची आतषबाजी होणार!
गेली अनेक वर्षं “आज होईल, उद्या होईल” करत रखडलेल्या या निवडणुकांसाठी कोर्टाने निवडणूक आयोगाला चक्क चार आठवड्यांत अधिसूचना काढायला सांगितली आहे. आणि नुसतं सांगून कोर्ट थांबलं नाही, तर “बाबांनो, जरा मनावर घ्या आणि चार महिन्यांत सगळा कार्यक्रम आटपा,” असा प्रेमळ सल्लाही दिला आहे. म्हणजे विचार करा, इतके दिवस शांत असलेले राजकीय आखाडे आता कसे फुरफुरू लागतील!
‘बांठिया’ पॅटर्न, पण ‘अटी लागू’
कोर्टाने स्पष्ट सांगितलंय की, बांठिया आयोगाच्या अहवालाच्या आधी जे ओबीसी आरक्षण होतं, तेच लागू करून निवडणुका घ्या. पण थांबा, इथे एक छोटासा ‘ट्विस्ट’ आहे. या निवडणुका म्हणजे बांठिया आयोगाच्या अहवालाला आव्हान देणाऱ्या याचिकांच्या अंतिम निकालाच्या अधीन राहतील. म्हणजे, “पिक्चर अभी बाकी है मेरे दोस्त!” पण तोपर्यंत तरी “ढोल ताशे वाजवा रे!”
“स्थानिक स्वराज्य संस्था म्हणजे लोकशाहीची मुळं आहेत, ती कशी काय रखडू शकतात?” असा सवाल करत कोर्टाने गेल्या ५ वर्षांपासून कार्यकारी मंडळांशिवाय सुरू असलेल्या कारभारावर जोरदार ताशेरे ओढले. जणू काही “घरचा कारभारी नसताना पाहुण्यांनीच घर चालवावं,” अशीच काहीशी गत झाली होती!
धाराशिवमध्ये जल्लोषाची तयारी, कार्यकर्त्यांमध्ये नवी ‘जान’!
आणि या बातमीने धाराशिव जिल्ह्यात तर जणू दिवाळीच सुरू झाली आहे! तिकडे एक जिल्हा परिषद, सहा पंचायत समित्या (धाराशिव, तुळजापूर, उमरगा, भूम, परंडा, कळंब), दोन नगर पंचायती (लोहारा, वाशी) आणि तब्बल आठ नगरपालिका (धाराशिव, तुळजापूर, उमरगा, भूम, परंडा, कळंब, नळदुर्ग, मुरूम) निवडणुकीच्या मांडवाखाली येण्यास सज्ज झाल्या आहेत.
गेली तीन वर्षं या सगळ्या संस्थांवर प्रशासकांचं राज्य होतं. कार्यकर्ते बिचारे नुसतेच हातावर हात चोळत बसले होते. “कधी एकदाचा बिगुल वाजतोय आणि कधी एकदा प्रचाराला लागतोय,” या विचाराने त्यांना रात्री झोपही लागत नव्हती (असं आम्ही ऐकून आहोत!). आता मात्र त्यांच्या जीवात जीव आला असून, त्यांनी गुलालही बुक करून ठेवला असण्याची शक्यता नाकारता येत नाही!
धाराशिवचा राजकीय ‘दंगल’ कोण जिंकणार?
आता खरी मजा तर पुढेच आहे. धाराशिव जिल्ह्याचा राजकीय आखाडा सध्या कसा आहे, त्यावर एक नजर टाकूया:
- खासदार: ओमराजे निंबाळकर (शिवसेना ठाकरे गट) – दिल्लीत धाराशिवचा आवाज!
- आमदार:
- कैलास पाटील (धाराशिव-कळंब) – (शिवसेना ठाकरे गट)
- प्रवीण स्वामी (उमरगा) – (शिवसेना ठाकरे गट)
- राणा जगजितसिंह पाटील (तुळजापूर) – (भाजप)
- तानाजी सावंत (भूम-परंडा) – (शिवसेना शिंदे गट)
आता प्रश्न हा आहे की, महायुती आणि महाविकास आघाडी एकत्र लढणार की “एकला चलो रे” चा नारा देणार? कोणत्या पक्षाचा उमेदवार कोणाच्या विरोधात शड्डू ठोकणार, आणि कोण कोणाला धोबीपछाड देणार, हे पाहण्यासाठी अख्खा महाराष्ट्र (आणि खासकरून धाराशिव) डोळे लावून बसला आहे.
तर मंडळी, तयार रहा! पुढचे काही महिने राजकीय आरोप-प्रत्यारोपांच्या फैरी, आश्वासनांची बरसात आणि कार्यकर्त्यांच्या उत्साहाला उधाण येणार आहे. तोपर्यंत, ज्यांना कोणाला भावी उमेदवार म्हणून मिरवायचंय, त्यांनी आतापासूनच तयारीला लागा, कारण “अब की बार, किसकी सरकार?” हा प्रश्न लवकरच विचारला जाणार आहे!
- बोरूबहाद्दर
