तामलवाडी: तामलवाडी पोलीस ठाण्याच्या हद्दीत डिसेंबर २०२५ मध्ये घडलेल्या जनावरांच्या चोरीचा छडा लावण्यात पोलिसांना यश आले आहे. तांत्रिक विश्लेषण आणि गोपनीय माहितीच्या आधारे पोलिसांनी सावरगाव येथील दोन सराईत चोरट्यांसह लातूरमधील एका खरेदीदारास अटक केली आहे. त्यांच्याकडून चोरीच्या दोन म्हशी आणि वाहतुकीसाठी वापरलेले वाहन जप्त करण्यात आले आहे.
डिसेंबर महिन्यात नांदुरी गावातून तीन म्हशी चोरीला गेल्याची घटना घडली होती. याप्रकरणी तामलवाडी पोलीस ठाण्यात गुन्हा दाखल करण्यात आला होता. या गुन्ह्याचा तपास करत असताना सहाय्यक पोलीस निरीक्षक गोकुळ ठाकूर आणि त्यांच्या पथकाला गोपनीय माहिती मिळाली. त्याआधारे त्यांनी अजीम निजाम सय्यद आणि निलेश नागनाथ तानवडे (दोघे रा. सावरगाव, ता. तुळजापूर) यांना ताब्यात घेतले.
पोलिसी खाक्या दाखवताच दोघांनी गुन्ह्याची कबुली दिली. त्यांनी नांदुरी येथून तीन म्हशी चोरल्याचे कबूल केले. त्यापैकी एक म्हैस त्यांनी लातूर येथील सोहेल साजिद कुरेशी याला विकली होती. पोलिसांनी तत्काळ कारवाई करत सोहेल कुरेशी यालाही ताब्यात घेतले आणि म्हैस विक्रीतून मिळालेली रक्कम जप्त केली.
तसेच मुख्य आरोपी अजीम सय्यद याच्याकडून दोन म्हशी आणि गुन्ह्यात वापरलेले वाहन जप्त करण्यात आले आहे. या गुन्ह्यात एकूण तीन आरोपींना अटक करण्यात आली आहे. आरोपी अजीम सय्यद याच्याकडून जनावरे चोरीचे आणखी काही गुन्हे उघडकीस येण्याची शक्यता असून पोलीस अधिक तपास करत आहेत.
सदरची कामगिरी पोलीस अधीक्षक रितू खोखर, अपर पोलीस अधीक्षक शफाकत आमना यांच्या मार्गदर्शनाखाली सपोनि गोकुळ ठाकूर, पोलीस उपनिरीक्षक प्रदीप टेकाळे, पोलीस हवालदार तोगे, काझी, पोलीस अंमलदार सुरज नरवडे, गोपाळ सलगर, गायकवाड, शेख आणि नितीन भोसले यांनी केली.
