कळंब: छत्रपती संभाजीनगर ते कळंब असा एसटी बसने प्रवास करणाऱ्या एका २२ वर्षीय तरुणीच्या बॅगेतील सोन्याचे दागिने गर्दीचा फायदा घेत एका अज्ञात महिलेने चोरल्याची घटना घडली आहे. याप्रकरणी कळंब पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, अर्शिया शारुख पटेल (वय २२, रा. जहागिरदार कॉलनी, रेल्वे स्टेशन जवळ, छत्रपती संभाजीनगर) या २८ जानेवारी २०२६ रोजी सकाळी छत्रपती संभाजीनगर येथून कळंबला जाण्यासाठी एसटी बसने प्रवास करत होत्या.
प्रवासादरम्यान मांजरसुंभा ते कळंब या टप्प्यात बसमध्ये मोठी गर्दी झाली होती. याच गर्दीचा फायदा घेत अर्शिया यांच्या शेजारी उभ्या असलेल्या किंवा बसलेल्या एका अनोळखी महिलेने त्यांच्या नजरचुकीने बॅगेची चेन उघडून आतील १४ ग्रॅम वजनाचे सोन्याचे दागिने चोरून नेले. बस कळंबला पोहोचल्यानंतर हा प्रकार उघडकीस आला.
याप्रकरणी अर्शिया पटेल यांनी ३१ जानेवारी २०२६ रोजी दिलेल्या फिर्यादीवरून कळंब पोलीस ठाण्यात भारतीय न्याय संहिता (B.N.S.) कलम ३०३ (२) अन्वये अज्ञात महिलेविरुद्ध गुन्हा दाखल करण्यात आला आहे. पुढील तपास कळंब पोलीस करत आहेत.
