धाराशिव: मुंबईहून धाराशिवकडे येणाऱ्या एका खाजगी ट्रॅव्हल्स बसमध्ये प्रवासी महिलेची नजर चुकवून अज्ञात चोरट्याने सोन्याचे दागिने आणि रोकड असा सुमारे दोन लाख रुपयांचा ऐवज चोरल्याची घटना घडली आहे. याप्रकरणी धाराशिव शहर पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सुवर्णा उदय यादव (वय ४६, रा. तारा को-ऑपरेटिव्ह हाउसिंग सोसायटी, खारघर, नवी मुंबई) या आणि त्यांची बहीण ‘विश्व ट्रॅव्हल्स’च्या बसने (क्र. एमएच २५ एजे ७९००) प्रवास करत होत्या. त्या हिरानंदानी हायवे, खारघर येथून बसमध्ये बसल्या होत्या.
प्रवासादरम्यान वडगाव शिवारात ही चोरीची घटना घडली. अज्ञात चोरट्याने सुवर्णा यादव यांच्या बॅगमधील ६० ग्रॅम वजनाचे सोन्याचे दागिने, १५ हजार रुपये रोख रक्कम आणि एक घड्याळ असा एकूण १ लाख ९८ हजार रुपयांचा मुद्देमाल लंपास केला. बस धाराशिवला पोहोचल्यानंतर बॅग तपासली असता चोरीचा हा प्रकार उघडकीस आला.
याप्रकरणी सुवर्णा यादव यांनी दिलेल्या फिर्यादीवरून धाराशिव शहर पोलीस ठाण्यात भारतीय न्याय संहिता (B.N.S.) कलम ३०३ (२) अन्वये अज्ञात चोरट्याविरुद्ध गुन्हा दाखल करण्यात आला आहे. पुढील तपास पोलीस करत आहेत.
