धाराशिव: कर्तव्यात जाणीवपूर्वक कसूर केल्याचा ठपका ठेवत जिल्हा पोलीस अधीक्षक रितु खोखर यांनी तामलवाडी पोलीस ठाण्यातील एका पोलीस अंमलदाराला आज (दि. २६) निलंबित केले आहे. अलताफ मकबुल गोलंदाज (बक्कल नं. १४१३) असे निलंबित करण्यात आलेल्या कर्मचाऱ्याचे नाव आहे.
एका वाहनचालकडून प्रवासी जास्त आहेत, अशी अडवणूक करून २०० रुपये लाच स्वीकरल्याप्रकरणी अल्ताफ गोलंदाज यास निलंबित करण्यात आले आहे.या घटनेचा व्हिडिओ सोशल मीडियावर व्हायरल झाला होता.
तामलवाडी पोलीस ठाणे येथे कार्यरत असलेले पोलीस अंमलदार अलताफ गोलंदाज हे १९ नोव्हेंबर २०२५ रोजी नेमुन दिलेल्या कर्तव्यावर होते. यावेळी त्यांनी आपल्या कर्तव्यात जाणीवपूर्वक कसूर केली. या प्रकरणाची गंभीर दखल घेत पोलीस अधीक्षक रितु खोखर यांनी आज, २६ नोव्हेंबर २०२५ रोजी गोलंदाज यांच्यावर निलंबनाची कारवाई केली आहे.
शिस्तभंग खपवून घेणार नाही
या कारवाईनंतर बोलताना पोलीस अधीक्षक रितु खोखर यांनी स्पष्ट केले की, “पोलीस विभागात जबाबदारी आणि शिस्त यांना प्राधान्य दिले जाईल. कर्तव्यात अशा प्रकारचा निष्काळजीपणा झाल्यास कोणतीही सहनशीलता (टॉलरेन्स) दाखविली जाणार नाही.”.
