तामलवाडी – तुळजापूर तालुक्यातील तामलवाडी येथील टोलनाक्यावर एका व्यक्तीने कार्यालयाच्या खिडक्यांची तोडफोड करून सार्वजनिक मालमत्तेचे नुकसान केले आणि तेथील कर्मचाऱ्याला मारहाण करून जीवे मारण्याची धमकी दिल्याची घटना घडली आहे. याप्रकरणी पीडित कर्मचाऱ्याच्या तक्रारीवरून तामलवाडी पोलीस ठाण्यात एका आरोपीविरुद्ध गुन्हा दाखल करण्यात आला आहे.
मिळालेल्या माहितीनुसार, फिर्यादी श्रीकांत सुरेश ग्राम (वय ४१ वर्षे, व्यवसाय खाजगी नोकरी, रा. कल्याणनगर, जुळे सोलापूर) हे तामलवाडी टोलनाक्यावर कार्यरत आहेत. दिनांक ५ एप्रिल २०२५ रोजी रात्री सुमारे ९ वाजून १० मिनिटांनी टोल ऑफिसच्या समोरील बाजूस असताना, आरोपी अमोल सुनिल माळी (रा. तामलवाडी टोलनाक्याच्या पाठीमागे, ता. तुळजापूर) याने तेथे येऊन टोलनाका ऑफिसच्या खिडक्यांची तोडफोड केली.
यानंतर आरोपी अमोल माळी याने फिर्यादी श्रीकांत ग्राम यांना शिवीगाळ करत लाथाबुक्क्यांनी मारहाण करून जखमी केले. तसेच, फिर्यादी व त्यांच्या इतर सहकाऱ्यानाही शिवीगाळ करत जीवे ठार मारण्याची धमकी दिली, असे श्रीकांत ग्राम यांनी आपल्या तक्रारीत म्हटले आहे.
या घटनेप्रकरणी श्रीकांत ग्राम यांनी ६ एप्रिल २०२५ रोजी तामलवाडी पोलीस ठाण्यात फिर्याद दाखल केली. पोलिसांनी आरोपी अमोल माळी याच्याविरुद्ध भारतीय न्याय संहिता (BNS) कलम ११८(१) (स्वेच्छेने दुखापत करणे), ३२४(४) (सार्वजनिक ठिकाणी गैरवर्तन), ३५२ (धमकी देणे), ३५१(२) व ३५१(३) (गुन्हेगारी जमाव) आणि सार्वजनिक मालमत्ता नुकसान प्रतिबंधक अधिनियम १९८४ चे कलम ३ अन्वये गुन्हा नोंदवला आहे. तामलवाडी पोलीस या प्रकरणाचा पुढील तपास करत आहेत.
