वाशी: चिंचा झाडण्याच्या (काढण्याच्या) क्षुल्लक कारणावरून एका ४० वर्षीय व्यक्तीला शिवीगाळ करत दगडाने मारहाण करून गंभीर जखमी केल्याची घटना वाशी तालुक्यातील तांदुळवाडी येथे घडली आहे. याप्रकरणी वाशी पोलीस ठाण्यात एकावर गुन्हा दाखल करण्यात आला आहे.
पोलिसांनी दिलेल्या माहितीनुसार, विनोद भिकाजी गायकवाड (वय ४०, रा. तांदुळवाडी, ता. वाशी) असे जखमी फिर्यादीचे नाव आहे. ही घटना २१ नोव्हेंबर २०२५ रोजी सायंकाळी ६ वाजताच्या सुमारास तांदुळवाडी येथे घडली.
फिर्यादी विनोद गायकवाड आणि आरोपी किरण संजय गायकवाड (रा. तांदुळवाडी) यांच्यात ‘चिंचा झाडायला येण्याच्या’ कारणावरून वाद झाला. या वादाचे रूपांतर हाणामारीत झाले. आरोपी किरण गायकवाड याने विनोद यांना अश्लील शिवीगाळ करत लाथाबुक्क्यांनी मारहाण केली. इतक्यावरच न थांबता त्याने विनोद यांना दगडाने मारून गंभीर जखमी केले आणि “तुला जिवे ठार मारतो,” अशी धमकी दिली.
उपचारानंतर विनोद गायकवाड यांनी २७ नोव्हेंबर रोजी वाशी पोलीस ठाण्यात फिर्याद दिली. त्यावरून आरोपी किरण गायकवाड विरुद्ध भारतीय न्याय संहिता (BNS) कलम ११८ (२), ३५२, ३५१ (२) आणि ३५१ (३) अन्वये गुन्हा दाखल करण्यात आला आहे. पुढील तपास वाशी पोलीस करत आहेत.
