मुरुम: उमरगा तालुक्यातील कडदोरा शिवारात असलेल्या एका खाजगी सौर ऊर्जा (सोलर) प्रकल्पाच्या केंद्रामध्ये अज्ञात चोरट्यांनी डल्ला मारल्याची घटना उघडकीस आली आहे. चोरट्यांनी कंपनीच्या यंत्रणेतील मौल्यवान केबल्स आणि तांब्याच्या (कॉपर) पट्ट्या चोरून नेल्या आहेत. या चोरी दरम्यान चोरट्यांनी तब्बल ५,२०० मीटर केबलचे तुकडे करून कंपनीचे मोठे नुकसान केले आहे. याप्रकरणी मुरुम पोलीस ठाण्यात गुन्हा दाखल करण्यात आला आहे.
रात्रीच्या अंधारात सोलर कंपनीत डल्ला
पोलिसांकडून मिळालेल्या प्राथमिक माहितीनुसार, कडदोरा शिवारात ‘असेन्स रिन्युएबल प्रायव्हेट लिमिटेड’ (Accence Renewable Pvt Ltd) ही नामांकित सोलर कंपनी कार्यरत आहे. २१ जून २०२६ रोजी रात्री ११:०० ते २२ जून २०२६ च्या सकाळी १०:०० वाजण्याच्या सुमारास अज्ञात चोरट्यांनी कंपनीच्या परिसरात प्रवेश केला.
५,२०० मीटर केबलची तोडफोड; ‘हा’ माल केला लंपास
चोरट्यांनी अत्यंत शिताफीने कंपनीच्या ट्रान्सफॉर्मर आणि यंत्रणेला जोडलेली ०६ एमएम डीसी रेड-ब्लॅक केबल (किंमत अंदाजे ५५,००० रुपये) कटरच्या साहाय्याने कापून चोरून नेली. ही केबल काढताना चोरट्यांनी तिचे तब्बल ५,२०० मीटर लांबीचे तुकडे करून यंत्रणेचे मोठे नुकसान केले.
याशिवाय, ट्रान्सफॉर्मरमधील स्पेयर अर्थ बसबार, टीन्ड कॉपर बसबार कंपनीचे ८० एमएमच्या १२ पट्ट्या आणि कॉपर स्ट्रिपच्या ६ पट्ट्या असा एकूण ७०,००० रुपये किमतीचा मौल्यवान मुद्देमाल चोरट्यांनी लंपास केला.
मुरुम पोलिसांत गुन्हा दाखल
हा चोरीचा प्रकार उघडकीस आल्यानंतर कंपनीचे प्रतिनिधी विनोद मधुकर रणखांब (वय २९ वर्षे, रा. कडदोरा, ता. उमरगा, जि. धाराशिव) यांनी २५ जून २०२६ रोजी मुरुम पोलीस ठाणे गाठून तक्रार दिली. त्यांच्या प्रथम खबरीवरून पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३०३(२) (चोरी) आणि ३२४(४) (मालमत्तेचे नुकसान करणे) अन्वये गुन्हा नोंदवला आहे. मुरुम पोलीस या प्रकरणाचा पुढील तपास करत असून परिसरातील सीसीटीव्ही फुटेजच्या आधारे चोरांचा माग काढला जात आहे.
