धाराशिव जिल्ह्यात चोरीच्या घटनांमध्ये वाढ

लोहारामध्ये शेतकऱ्याच्या गोट्यातून दोन जर्सी गायी चोरीला

लोहारा: तालुक्यातील हिप्परगा रवा येथील शेतकरी कोंडीबा जाधव यांच्या शेतातील गोट्यातून १९ ऑगस्टच्या रात्री अज्ञात चोरट्यांनी दोन जर्सी गायी चोरून नेल्या. या गायींची किंमत ७० हजार रुपये इतकी आहे.

जाधव यांनी दिलेल्या माहितीनुसार, १९ ऑगस्ट रोजी रात्री १ वाजल्यापासून पहाटे ४ वाजेपर्यंतच्या कालावधीत ही चोरी झाली. चोरट्यांनी गोट्याचे कुलूप तोडून आत प्रवेश केला आणि दोन्ही गायी चोरून नेल्या.

याप्रकरणी कोंडीबा जाधव यांनी २० ऑगस्ट रोजी लोहारा पोलीस ठाण्यात फिर्याद दिली. पोलिसांनी भारतीय दंड संहिता कलम ३३४(१), ३०५(ए) अन्वये गुन्हा दाखल करून अधिक तपास सुरू केला आहे.

धाराशिव शहरातून मोटारसायकल चोरी

धाराशिव: सिध्देश्वर वडगाव मंदीराजवळून १८ ऑगस्ट रोजी पहाटे २ ते ७ वाजण्याच्या दरम्यान एका सिल्व्हर रंगाची रेड ऑन मोटारसायकल चोरीला गेली आहे. ही मोटारसायकल महादेव अर्जुने यांच्या राहत्या घरासमोरून चोरीला गेली असून तिची किंमत अंदाजे ४५ हजार रुपये आहे.

महादेव अर्जुने हे मूळचे लातूर जिल्ह्यातील शिरूर अनंतपाळ तालुक्यातील गणेवाडी येथील रहिवासी असून सध्या ते धाराशिव येथील स्वयभुं रोपवटिका मोरे येथे काम करतात. २० ऑगस्ट रोजी त्यांनी या चोरीची तक्रार धाराशिव शहर पोलीस ठाण्यात दिली. पोलिसांनी भारतीय दंड संहिता कलम ३०३(२) अन्वये गुन्हा दाखल करून तपास सुरू केला आहे.