तुळजापूर: तुळजाभवानी मंदिर संस्थानचे मुख्य कार्यकारी अधिकारी (CEO) उपेंद्र तामोरे यांची केवळ दोन महिन्यांच्या आतच बदली झाली आहे. यामुळे मंदिराचे सीईओ पद पुन्हा एकदा रिक्त झाले आहे. तामोरे यांची अवघ्या ५८ दिवसांची कारकीर्द चांगलीच वादग्रस्त ठरल्याची चर्चा आहे.
उपेंद्र तामोरे यांनी गेल्या २ जून रोजी तुळजाभवानी मंदिर संस्थानच्या मुख्य कार्यकारी अधिकारी पदाचा कार्यभार स्वीकारला होता. आता त्यांची बदली पदोन्नतीने झाली असून, त्यांच्यावर ‘रत्नागिरी-सिंधुदुर्ग जात पडताळणी समिती’च्या अध्यक्षपदाची जबाबदारी सोपवण्यात आली आहे.
का ठरली कारकीर्द वादग्रस्त?
सीईओ पदाचा कार्यभार स्वीकारताच तामोरे यांनी दर्शन रांगेतील भेदभाव संपवण्याच्या उद्देशाने एक महत्त्वपूर्ण निर्णय घेतला होता. त्यांनी ‘सशुल्क दर्शन’ आणि ‘धर्मदर्शन’ रांगेचे एकत्रीकरण केले होते. मात्र, या निर्णयाचा उलटा परिणाम झाला. रांगांच्या एकत्रीकरणामुळे धर्म दर्शन रांगेतील भाविकांना दर्शनासाठी अधिक वेळ लागू लागला. त्यामुळे या निर्णयाला भाविकांकडून विरोध झाला. दर्शन रांगेत भाविकांमध्ये अनेकदा वादावादीच्या घटनाही घडल्या. याच कारणामुळे तामोर यांची कारकीर्द वादग्रस्त ठरल्याचे सांगण्यात येत आहे.
विकास आराखड्याच्या पार्श्वभूमीवर आश्चर्य
तामोर यांच्या नियुक्तीमुळे तुळजाभवानी मंदिर संस्थानला पहिल्यांदाच ‘अप्पर जिल्हाधिकारी’ दर्जाचा अधिकारी मिळाला होता. राज्य शासनाकडून मंजूर करण्यात आलेल्या तुळजाभवानी मंदिर विकास आराखड्याच्या पार्श्वभूमीवर त्यांची ही नियुक्ती अत्यंत महत्त्वपूर्ण मानली जात होती. मात्र, अवघ्या दोन महिन्यांतच त्यांची अचानक बदली झाल्याने सर्वत्र आश्चर्य व्यक्त केले जात आहे.
