तुळजापूर (धाराशिव लाइव्ह): तुळजाभवानी मंदिर संस्थानच्या प्रशासकीय कार्यालयातील जनसंपर्क अधिकारी आणि सहाय्यक जनसंपर्क अधिकारी यांना फोनवरून अश्लील भाषेत शिवीगाळ केल्याचा धक्कादायक प्रकार उघडकीस आला आहे. शासकीय कामकाजात अडथळा आणून मानसिक त्रास दिल्याच्या प्रकरणी तुळजापूर पोलीस ठाण्यात विजय गंगणे यांच्यावर गुन्हा दाखल करण्यात आला आहे. विजय गंगणे हे नगराध्यक्ष विनोद गंगणे यांचे बंधू आणि नगरसेविका प्रियंका गंगणे यांचे पती आहेत.
डोली सुविधा तात्पुरती होती बंद
पोलीस सूत्रांकडून मिळालेल्या माहितीनुसार, अभिजीत आनंतराव तेरखेडकर (वय ३६) हे तुळजाभवानी मंदिर संस्थानमध्ये जनसंपर्क अधिकारी (PRO) म्हणून कार्यरत आहेत. सध्या मंदिरात पुरातत्व विभागामार्फत जतन व संवर्धनाचे काम चालू आहे, तसेच डोली मार्गावर गोमुख तीर्थाशेजारील भिंतीचे पाडकाम सुरू आहे. मार्गावर दगड पडलेले असल्याने भाविकांच्या सुरक्षिततेच्या दृष्टीने प्रशासनाने १८ जुलै २०२६ रोजी सकाळी ११.३० वाजेपासून वयोवृद्ध व दिव्यांग भाविकांसाठी असणारी ‘डोली’ (खुर्ची) सुविधा तात्पुरती बंद केली होती.
नेमका प्रकार काय घडला?
१८ जुलै रोजी दुपारी पावणे तीन ते तीनच्या सुमारास सुरज प्रताप जगताप नावाचे पुजारी कार्यालयात आले आणि त्यांनी एका अपंग भाविकासाठी डोलीची मागणी केली. कार्यालयात उपस्थित असलेले जनसंपर्क अधिकारी अभिजीत तेरखेडकर आणि सहाय्यक जनसंपर्क अधिकारी उमाकांत क्षीरसागर यांनी त्यांना काम सुरू असल्याने सुविधा बंद असल्याचे समजावून सांगितले.
यानंतर पुजाऱ्याने कार्यालयाच्या बाहेर जाऊन तुळजापूर येथील विजय विलास गंगने या व्यक्तीला मोबाईलवरून फोन लावला आणि तो मोबाईल क्षीरसागर यांच्याकडे दिला. फोनवर बोलताना विजय गंगने याने डोली सुविधा बंद का आहे, अशी विचारणा करत उमाकांत क्षीरसागर आणि त्यानंतर फोनवर आलेले पीआरओ अभिजीत तेरखेडकर यांना अत्यंत अश्लील भाषेत शिवीगाळ केली. सार्वजनिक ठिकाणी मंदिर संस्थानचे काम करत असताना या व्यक्तीने फोनवरून अर्वाच्य भाषा वापरून अधिकाऱ्यांना मानसिक त्रास दिला.
गुन्हा दाखल
याप्रकरणी जनसंपर्क अधिकारी अभिजीत तेरखेडकर यांनी दिलेल्या फिर्यादीवरून, २० जुलै २०२६ रोजी रात्री तुळजापूर पोलीस ठाण्यात विजय विलास गंगने (रा. तुळजापूर, जि. धाराशिव) याच्या विरुद्ध भारतीय न्याय संहिता (BNS) २०२३ च्या कलम २९६ आणि ३५१(४) अन्वये गुन्हा (FIR क्र. ०३६४/२०२६) दाखल करण्यात आला आहे. या प्रकरणाचा पुढील तपास हेड कॉन्स्टेबल बालाजी कामटकर हे करत आहेत.
