धाराशिव | धाराशिव नगर परिषदेच्या प्रभाग क्रमांक 20 चे नगरसेवक तथा पाणीपुरवठा व स्वच्छता सभापती विलास लोंढे यांना कथित अतिक्रमण प्रकरणात अपात्र ठरविण्याची मागणी महाराष्ट्र नवनिर्माण सेनेने (मनसे) जिल्हाधिकाऱ्यांकडे केली आहे. या प्रकरणाची पुढील सुनावणी 4 ऑगस्ट 2026 रोजी होणार आहे.
मनसेचे तालुकाध्यक्ष पाशाभाई शेख यांच्या मार्गदर्शनाखाली शहर उपाध्यक्ष राजेंद्र (राजू) कुराडे यांनी ॲड. कांबळे यांच्यामार्फत जिल्हाधिकाऱ्यांकडे अर्ज दाखल केला आहे.
अर्जात असा दावा करण्यात आला आहे की, विलास लोंढे आणि त्यांच्या कुटुंबीयांनी महाराष्ट्र शासनाच्या मालकीच्या गायरान गट क्रमांक 426 वरील जागेवर कथित अतिक्रमण करून तेथे तीन मजली निवासी व व्यावसायिक इमारत उभारली आहे.
या कारणावरून महाराष्ट्र नगर परिषद, नगर पंचायती व औद्योगिक नगरी अधिनियम, 1965 मधील संबंधित तरतुदींनुसार त्यांचे नगरसेवक पद रद्द करण्यात यावे, अशी मागणी करण्यात आली आहे.
या अर्जावर 14 जुलै 2026 रोजी जिल्हाधिकाऱ्यांसमोर सुनावणी झाली असून, पुढील सुनावणीसाठी 4 ऑगस्ट 2026 ही तारीख निश्चित करण्यात आली आहे.
