तुळजापूर : सोन्याचे बिस्कीट देण्याचे आमिष दाखवून एका ६० वर्षीय वृद्ध महिलेचे ६५ हजार रुपये किमतीचे सोन्याचे कानातले दागिने घेऊन त्याबदल्यात खोटे बिस्कीट देऊन फसवणूक केल्याची घटना तुळजापूर येथे घडली आहे. याप्रकरणी तुळजापूर पोलीस ठाण्यात दोन अज्ञात भामट्यांविरुद्ध गुन्हा दाखल करण्यात आला आहे.
नेमकी घटना काय?
सोलापूर जिल्ह्यातील बार्शी तालुक्यातील धामणगाव येथील रहिवासी निलाबाई चंद्रकांत चौगुले (वय ६० वर्षे) या १ सप्टेंबर २०२६ रोजी सकाळी ११.१५ वाजेच्या सुमारास तुळजापूर येथील दीपक चौकाजवळ, शिंदे हॉटेलच्या पाठीमागे आल्या होत्या.
त्या ठिकाणी दोन अज्ञात इसमांनी निलाबाई यांना गाठले आणि “आम्ही तुम्हाला सोन्याचे बिस्कीट देतो, तुम्ही आम्हाला तुमचे कानातले दागिने काढून द्या,” अशी बतावणी करून भूलथापा दिल्या. त्यांच्या बोलण्यावर विश्वास ठेवून निलाबाई यांनी आपल्या कानातील ६५ हजार रुपये किमतीचे ११ ग्रॅम वजनाचे सोन्याचे दागिने काढून त्या भामट्यांना दिले.
त्याबदल्यात त्या दोघांनी निलाबाई यांच्या हातात सोन्यासारखे पिवळे दिसणारे खोटे धातूचे बिस्कीट सोपवले आणि तेथून पोबारा केला. काही वेळाने ते बिस्कीट खोटे असल्याचे लक्षात आल्यानंतर आपली फसवणूक झाल्याचे महिलेच्या निदर्शनास आले.
तुळजापूर पोलिसांत गुन्हा नोंद
याप्रकरणी निलाबाई चौगुले यांनी २ सप्टेंबर २०२६ रोजी तुळजापूर पोलीस ठाण्यात येऊन तक्रार दिली. त्यांच्या प्रथम खबरेवरून पोलिसांनी दोन अज्ञात आरोपींविरुद्ध भारतीय न्याय संहिता (BNS) कलम ३१८(४) आणि ३(५) अन्वये फसवणुकीचा गुन्हा नोंदवला आहे. तुळजापूर पोलीस परिसरातील सीसीटीव्ही फुटेजच्या मदतीने त्या दोन्ही भामट्यांचा शोध घेत आहेत.
