तुळजापूर – महाराष्ट्राची कुलस्वामिनी आई तुळजाभवानीचा नवरात्र महोत्सव सध्या मोठ्या धामधुमीत सुरु आहे. महाराष्ट्र, कर्नाटक, तेलंगणातील लाखो भाविक “आई राजा उदो” म्हणत देवीच्या दर्शनासाठी लांबलचक रांगेत उभे आहेत. एका अंदाजानुसार, रोज किमान पाच लाख भाविक तुळजापूरात दाखल होत असून, देवीचं दर्शन घेण्यासाठी साधारण आठ ते दहा तासांचा अवधी लागत आहे. पण, या गजबजलेल्या उत्सवात एक खास ‘व्हीआयपी’ रस्ता तयार झालेला आहे – ज्यातून थेट पाच मिनिटात देवीचं दर्शन घेता येतं! मात्र, या मार्गाने सरळ जाण्यासाठी एक गरज आहे – तुमच्याकडे असावा हवा तो ‘व्हीआयपी पास’.
तर आता गंमतीची गोष्ट अशी की, या ‘व्हीआयपी पास’ च्या खेळात भाविकांपेक्षा अधिक सक्रिय आहेत आपले प्रिय पत्रकार मंडळी! काही पत्रकारांनी केवळ कव्हरेजसाठी हा पास घेतला आहे, पण असं दिसतंय की या पासच्या आशीर्वादामुळे त्यांनी देवीच्या नवरात्र महोत्सवाच्या चांगल्या आणि वाईट घटनांकडे पूर्ण दुर्लक्ष केलं आहे. तुळजापुरातील अवैध धंदे असोत, जुगार खेळ असोत, किंवा बोगस पासची विक्री असो – काहीही घडो, आपल्या पत्रकारांना हे सगळं “दिसत” नाही!
हे पत्रकार व्हीआयपी पास गळ्यात अडकवून मोठ्या दिमाखात फिरताना दिसतात. त्यांचं महोत्सव कव्हरेज फारच खास आहे – “हा नेता आला, तो नेता दर्शनासाठी उभा राहिला!” आणि “सर्वकाही सुरळीत आहे” असा एकसारखा मंत्र ते जपतात. आता, ज्या भाविकांना रांगेत दहा दहा तास उभं राहून दर्शन मिळवायचं आहे, त्यांच्या हालांचं वर्णन करणं कदाचित त्यांच्या कव्हरेजच्या लायकीचं राहिलं नसेल!
तर, भाविकांनो, असं दिसतंय की तुम्ही देवीच्या दर्शनासाठी आले असाल, पण व्हीआयपी पास नसल्यास तुम्हाला देवीचं दर्शन म्हणजे एक दिवास्वप्नच! आणि पत्रकार मंडळी मात्र त्यांच्या ‘विशेष पास’ ने आनंदात आहेत. कुठल्या अवैध धंद्याच्या बातम्या त्यांना आवडत नाहीत. कारण कदाचित त्यांच्या हातात जेव्हा पास येतो तेव्हा त्यांच्या नजरेतील नैतिकता कुठेतरी गळून पडते!
प्रश्न असा आहे, ज्या पत्रकारांनी समाजातील अचूकता आणि सत्य दाखवायला हवं, त्यांनीच जर असं वागायचं ठरवलं, तर भाविकांना कुणाच्या आशीर्वादाची गरज आहे? त्याच्याच कामाचा तोल कुठे हरवला आहे. तुळजापूरच्या या उत्सवात, पत्रकारांनी दाखवलेला “विनम्रतेचा” आवेश आणि व्हीआयपी दर्शनाचा गाजावाजा पाहता, असं वाटतं की या महोत्सवात खरं दर्शन त्यांचं होतंय – देवीनं घेतलेल्या त्यांच्या निष्ठेचं!
आता, भाविकांसाठी काही उपदेशः तुळजापूरच्या यात्रेला जाताना तुमच्यासोबत श्रद्धा आणि भक्तीबरोबरच व्हीआयपी पास किंवा पोलिस नातेवाईक असणंही गरजेचं आहे. कारण तुमच्या आराधनेपेक्षा जास्त महत्त्वाचं असतं, तुमच्याकडे असलेला ‘पास’. आणि पत्रकारांसाठीही एकच उपदेश – भाविकांच्या हालांकडे दुर्लक्ष करायला लागलात तर तुमच्या शब्दांच्या आशीर्वादाचं महत्व कुठेच उरणार नाही!
