भूम : उमाचीवाडी (ता. भूम) येथे एका ६० वर्षीय वृद्धाला गैरकायद्याची मंडळी जमवून लाथाबुक्क्यांनी आणि दगडाने बेदम मारहाण केल्याची संतापजनक घटना उघडकीस आली आहे. हा प्रकार सोमवारी (ता. १६) रात्री अकरा वाजेच्या सुमारास शेतात घडला. याप्रकरणी भूम पोलिस ठाण्यात मंगळवारी (ता. १७) सहा जणांविरुद्ध गुन्हा दाखल करण्यात आला आहे.
भास्कर उत्तम शेळके (वय ६०, रा. उमाचीवाडी, ता. भूम) यांनी यासंदर्भात भूम पोलिसांत फिर्याद दिली आहे. यावरून गणेश अश्रू चिकणे, बहिरू अश्रू चिकणे, अतुल सतीश शेळके, महादेव ज्ञानबा गावडे, तात्या शेळके आणि कैलास उद्धव शेळके (सर्व रा. उमाचीवाडी/डमाचीवाडी, ता. भूम) यांच्यावर भारतीय न्याय संहितेच्या (BNS) संबंधित कलमांनुसार गुन्हा नोंदवण्यात आला आहे.
पोलिसांनी दिलेल्या माहितीनुसार, सोमवारी रात्री अकराच्या सुमारास भास्कर शेळके हे उमाचीवाडी येथील त्यांच्या शेतात होते. यावेळी वरील सर्व आरोपींनी एकत्र येत गैरकायद्याची मंडळी जमवली. त्यांनी शेळके यांना विनाकारण शिवीगाळ करण्यास सुरुवात केली. त्यानंतर रागाच्या भरात सर्वांनी मिळून शेळके यांना लाथाबुक्क्यांनी आणि दगडाने अमानुष मारहाण केली. या मारहाणीत शेळके हे जखमी झाले आहेत.
या घटनेनंतर भास्कर शेळके यांनी मंगळवारी (ता. १७) भूम पोलिस ठाणे गाठून प्रथम खबर दिली. पोलिसांनी या गंभीर घटनेची दखल घेत सर्व सहा आरोपींविरुद्ध भा.न्या.सं. कलम ११८(१), ११५(२), ३५२, ३५१(३), १८९(२), १९१(३) आणि १९० अन्वये गुन्हा दाखल केला आहे. या मारहाणीमागचे नेमके कारण अद्याप स्पष्ट झालेले नसून, या प्रकरणाचा पुढील तपास भूम पोलिस करत आहेत.
