उमरगा – तालुक्यातील मुळज तांडा येथे दोन गटांमध्ये झालेल्या वादातून एका व्यक्तीवर हल्ला केल्याची घटना घडली आहे. या प्रकरणी सात जणांविरुद्ध उमरगा पोलीस ठाण्यात गुन्हा दाखल करण्यात आला आहे.
गुन्हा दाखल करण्यात आलेल्या आरोपींमध्ये ओमकार गेमु राठोड, किशोर विश्वनाथ चव्हाण, अभिषेक वामन राठोड, अभिषेक दिलीप राठोड, सुजित देविदास जाधव, ओमकार जिवन जाधव, अर्जुन चव्हाण (सर्व रा. मुळज तांडा, ता. उमरगा, जि. धाराशिव) यांचा समावेश आहे.
ही घटना १३ मार्च २०२५ रोजी संध्याकाळी ७ वाजता घडली. फिर्यादी गोपीचंद सिताराम राठोड (वय ३७, रा. कराळी तांडा, ता. उमरगा) व त्यांचे चुलत भाऊ दिनेश राठोड यांना आरोपींनी “तुम्ही आमच्या चाड्या तुळशीराम चव्हाणला का सांगता?” या कारणावरून शिवीगाळ करत लाथाबुक्यांनी आणि हंटर केबलने मारहाण केली. तसेच त्यांना जिवे मारण्याची धमकीही दिली.
या प्रकरणी फिर्यादीने १४ मार्च २०२५ रोजी उमरगा पोलीस ठाण्यात तक्रार दाखल केली. त्यानुसार, पोलिसांनी भा.दं.वि. कलम १८९(२), १९१(२), १९१(३), १९०, ११८(१), ११५(२), ३५२, ३५१(२)(३) अंतर्गत गुन्हा नोंदवला आहे. पुढील तपास उमरगा पोलीस करत आहेत.
