उमरगा – उमरगा तालुक्यातील कोरेगाववाडी येथे एका ६५ वर्षीय शेतकऱ्याने जमिनीच्या वादातून गळफास घेऊन आत्महत्या केल्याची धक्कादायक घटना उघडकीस आली आहे. गोविंद विश्वनाथ लवटे (वय ६५, रा. कोरेगाववाडी) असे मयत शेतकऱ्याचे नाव आहे.
याप्रकरणी मयत गोविंद लवटे यांचे पुत्र काशिनाथ गोविंद लवटे (वय २६) यांनी उमरगा पोलीस ठाण्यात फिर्याद दिली आहे. फिर्यादीनुसार, मयत गोविंद यांनी आरोपी मुक्ताबाई श्रीमंत बाचके (रा. कोरेगाववाडी) यांच्या पतीकडून पाच लाख रुपये घेतले होते. या रकमेच्या बदल्यात त्यांनी आपली दीड एकर शेतजमीन तोंडी अटीवर दिली होती.
काही काळानंतर, मयत गोविंद लवटे यांनी पाच लाख रुपयांची जुळवाजुळव केली. त्यांनी मुक्ताबाई बाचके यांना “आमच्याकडे पाच लाख रुपये आले आहेत, ते घ्या व आमची जमीन आम्हाला परत करा,” अशी विनंती केली. मात्र, आरोपी मुक्ताबाई यांनी त्यांची दीड एकर जमीन परत देण्यास स्पष्ट नकार दिला.
आपले पैसे परत देऊनही जमीन परत मिळत नसल्याच्या नैराश्यातून गोविंद लवटे यांनी अखेर टोकाचे पाऊल उचलले. दि. १३ नोव्हेंबर रोजी सायंकाळी ७ ते ७:३० वाजण्याच्या सुमारास त्यांनी लक्ष्मण सोलनकर यांच्या शेतातील बोरीच्या झाडाला गळफास घेऊन आत्महत्या केली.
या घटनेनंतर, काशिनाथ लवटे यांनी दिलेल्या फिर्यादीवरून, उमरगा पोलिसांनी आरोपी मुक्ताबाई श्रीमंत बाचके यांच्याविरुद्ध भारतीय न्याय संहिता (BNS) कलम १०८ अन्वये (आत्महत्येस प्रवृत्त करणे) गुन्हा नोंदवला आहे. या प्रकरणाचा अधिक तपास पोलीस करत आहेत.
