धाराशिव – शहरातील भुयारी गटार योजनेवरून राजकीय आरोप-प्रत्यारोपांच्या फैरी झडू लागल्या असून, शिवसेना (ठाकरे गट) प्रवक्ते तानाजी जाधवर यांनी एका फेसबुक पोस्टद्वारे आमदार राणा पाटील यांना थेट आव्हान दिले आहे. “भुयारी गटार योजनेत भ्रष्टाचार झाल्याचा साक्षात्कार निवडणुकीच्या तोंडावर भाजपाला झाला,” अशी टीका करत, “त्या अगोदर राणा पाटील यांनी भुयारी गटार योजना गरजेची नव्हती हे स्पष्ट करावं,” अशी मागणी जाधवर यांनी केली आहे.
आपल्या फेसबुक पोस्टमध्ये तानाजी जाधवर यांनी भारतीय जनता पक्षावर व आमदार राणा पाटील यांच्यावर प्रश्नांची सरबत्ती केली आहे. जाधवर म्हणतात, “भुयारी गटार योजनेत भ्रष्टाचार झाल्याचा साक्षात्कार निवडणुकीच्या तोंडावर भाजपाला झाला हे अपेक्षितच होते. मुळात या योजनेला सुद्धा न्यायालयात आव्हान देणारी हीच मंडळी होती. न्यायालयाने देखील त्यांच्या वेळोवेळी केलेल्या सर्व पाच याचिका फेटाळल्या होत्या.”
सत्ताधाऱ्यांच्या भूमिकेवर प्रश्नचिन्ह उपस्थित करताना जाधवर यांनी म्हटले आहे की, “यात काय चुकीचं होतं, तर जून २०२२ पासून तुम्हीच सत्तेत आहात आणि तुमच्या सुदैवाने तेच नगरविकास मंत्री आहेत. मग याची चौकशी करण्याची मागणी आजवर तुम्ही का केली नाही?”
निवडणुका जवळ आल्याने भाजपकडे बोलण्यासाठी कोणतेही मुद्दे शिल्लक राहिलेले नाहीत, त्यामुळेच हा सर्व खटाटोप सुरू असल्याचा आरोपही जाधवर यांनी केला आहे. “निवडणुकीच्या तोंडावर काहीच मुद्दे नसल्याने आता कशावर तरी बोलायला पाहिजे म्हणून हा खटाटोप सुरु आहे,” असा टोला त्यांनी लगावला.
पोस्टच्या शेवटी, या संपूर्ण योजनेबद्दल आम्ही (ठाकरे गट) योग्यवेळी सविस्तर भूमिका मांडू, असे स्पष्ट करत त्यांनी पुन्हा एकदा मूळ आव्हानावर बोट ठेवले. “असो. या संपूर्ण योजनेबद्दल आम्ही योग्यवेळी आमची भूमिका मांडूच पण त्या अगोदर राणा पाटील यांनी भुयारी गटार योजना गरजेची नव्हती हे स्पष्ट करावं. एवढंच आमचं म्हणणं आहे,” असे म्हणत जाधवर यांनी चर्चेला नवे तोंड फोडले आहे.
