धाराशिव – नगरपालिका निवडणुकीसाठी उमेदवारी अर्ज दाखल करण्याचा शेवटचा दिवस तोंडावर आला असताना, धाराशिवमधील प्रमुख राजकीय आघाड्यांमध्ये जागावाटपाचा तिढा सुटण्याऐवजी अधिकच गुंतल्याचे चित्र आहे. शुक्रवारी रात्री उशिरापर्यंत महायुती आणि महाविकास आघाडीच्या मनोमिलनासाठी बैठका पार पडल्या, मात्र दोन्हीकडेही अपेक्षित ‘मनोमिलन’ झाल्याचे दिसले नाही.महायुतीची बैठक तुळजापूर येथील एका मठात पार पडली, तर महाविकास आघाडीची बैठक धाराशिव शहरातील राजे कॉम्प्लेक्समध्ये झाली.
महायुतीत मोठा ‘पेच’; पहिली फेरी फिस्कटली
महायुतीमध्ये जागावाटपावरून मोठा पेच निर्माण झाला असून, बैठकीची पहिली फेरी फिस्कटल्यातच जमा असल्याचे वृत्त आहे. आमदार राणाजगजितसिंह पाटील, शिवसेनेचे (शिंदे गट) माजी आमदार राजन साळवी आणि जिल्हाप्रमुख सूरज साळुंखे यांच्या उपस्थितीत ही बैठक झाली.
सूत्रांनी दिलेल्या माहितीनुसार, आमदार पाटील यांनी धाराशिव आणि तुळजापूर येथील जागा निश्चित केल्या असून, तेथे शिंदे गटाला कोणताही वाटा मिळणार नसल्याचे स्पष्टपणे सांगितल्याचे समजते.फार तर जिल्हाप्रमुख सूरज साळुंके आणि सुधीर पाटील यांना आम्ही ऍडजस्ट करू, असे सांगिल्यामुळे बैठक गुंडाळण्यात आली.मुंबईमध्ये पालकमंत्री प्रताप सरनाईक यांच्यासोबत बैठक घेऊन महायुती एकसंघ असल्याचे सांगण्यात आले होते, पण स्थानिक बैठक मध्ये शिंदे गटाला कोलण्यात आल्याने शिंदे गटात नाराजी असून, साळवी यांनी तात्काळ पक्षश्रेष्ठींना या घडामोडीची माहिती दिली आहे. आता पुढील दोन दिवसांत होणाऱ्या बैठकांमध्ये मार्ग निघाला, तरच महायुतीचे घोडे पुढे सरकणार आहे.
‘नाराजीनाट्य’: आमदार तानाजी सावंतांची बैठकीकडे पाठ
महायुतीच्या या महत्त्वाच्या बैठकीकडे माजी मंत्री आणि आमदार प्रा. डॉ. तानाजी सावंत यांनी पाठ फिरवल्याने राजकीय चर्चांना उधाण आले आहे. त्यांना बैठकीचे निमंत्रण असूनही ते अनुपस्थित राहिले.
या अनुपस्थितीमागेही नाराजीनाट्य असल्याचे बोलले जाते. सावंत यांच्याच मतदारसंघातील भूम व परंडा नगरपालिकांमध्ये त्यांच्या विरोधातच आघाडी करण्याचे मनसुबे रचले जात असून, यात खुद्द भाजपच आघाडीवर असल्याची चर्चा आहे. याच नाराजीतून सावंत बैठकीला गैरहजर राहिल्याचे समजते.
महाविकास आघाडीतही ‘मतभेद’ कायम
दुसरीकडे, महाविकास आघाडीच्या गोटातही फारसे आलबेल नाही. राजे कॉम्प्लेक्स येथे रात्री उशिरापर्यंत सुरू असलेल्या बैठकीतही नगरसेवक पदाच्या अनेक जागांवर एकमत होऊ शकले नाही. आघाडीतील मतभेद कायम असल्याचे दिसून आले.
इच्छुकांची भाऊगर्दी, ‘विनिंग कॅपॅसिटी’ ठरणार निकष
आघाड्यांमध्ये गोंधळ सुरू असताना, दोन्ही बाजूंकडे इच्छुकांची प्रचंड भाऊगर्दी झाली आहे.
-
भाजप: नगराध्यक्षपदासाठी तब्बल २९ जणांनी, तर नगरसेवक पदासाठी १९८ जणांनी मुलाखती दिल्या आहेत.
-
महाविकास आघाडी: नगराध्यक्षपदासाठी ७ जण (५ शिवसेना-ठाकरे गट, प्रत्येकी १ काँग्रेस व राष्ट्रवादी) आणि नगरसेवक पदासाठी १६१ जण इच्छुक आहेत.
तब्बल ९ वर्षांनी निवडणुका होत असल्याने इच्छुकांची संख्या वाढली आहे. भाजपसमोर ४१ जागांमध्ये मित्रपक्षांना सांभाळण्याचे आव्हान आहे. दोन्ही आघाड्यांसमोर बंडखोरीची भीती असून, हे आव्हान पेलणे पक्षश्रेष्ठींसाठी मोठी कसरत ठरणार आहे.
शेवटच्या टप्प्यात, हा गोंधळ पाहता, पक्ष आणि गटबाजी बाजूला सारून केवळ ‘विनिंग कॅपॅसिटी’ (जिंकण्याची क्षमता) असलेल्या उमेदवारालाच तिकीट देण्यावर भर दिला जात असल्याचे चित्र आहे.
तुळजापुरात महंतांच्या नावाची चर्चा
महायुतीमध्ये तुळजापूरच्या जागेसाठी महंत तुकोजी बुवा ( ड्रग्ज प्रकरणातील आरोपी विनोद गँगने यांचे बंधू ) यांच्या नावाची जोरदार चर्चा सुरू झाली आहे. विनोद गँगने यांच्या नावाला भाजप पक्षश्रेष्ठी मान्यता देणार नाही म्हणून आ. राणा पाटील यांनी हा पर्याय काढला आहे. विशेष म्हणजे, महायुतीची बैठक याच महंतांच्या मठात झाली होती. याबाबत स्वतः तुकोजी बुवा यांना विचारले असता, त्यांनी बैठकीत अन्य चर्चा झाल्याचे सांगितले, मात्र स्वतःच्या उमेदवारीबाबत मौन बाळगणे पसंत केले.
