धाराशिव: उमरगा शहरात घरफोडी करणाऱ्या एका आंतरराज्यीय टोळीचा उमरगा पोलिसांनी तांत्रिक तपासाच्या आधारे पर्दाफाश केला आहे . या कारवाईत पोलिसांनी दोन सराईत चोरट्यांना अटक केली असून, त्यांच्याकडून चोरीची काही रोकड हस्तगत करण्यात यश मिळवले आहे .
नेमकी घटना काय?
मिळालेल्या माहितीनुसार, उमरगा येथील रहिवासी अब्दुल वहाब शमशोद्दीन लदाफ हे ७ जून २०२६ रोजी आपल्या कुटुंबासह हैदराबाद येथे नातेवाईकांच्या लग्नासाठी गेले होते . घर बंद असल्याचा फायदा उठवून चोरट्यांनी त्याच रात्री त्यांच्या घराचे कुलूप आणि कपाटाचे लॉकर तोडून आत ठेवलेले सोन्या-चांदीचे दागिने व रोख रक्कम, असा एकूण २,७५,२५० रुपयांचा मुद्देमाल लंपास केला होता . याप्रकरणी उमरगा पोलीस ठाण्यात घरफोडी आणि चोरीचा गुन्हा दाखल करण्यात आला होता .
डॉग स्कॉड आणि सीडीआरच्या मदतीने तपास
गुन्ह्याचे गांभीर्य ओळखून पोलिसांनी तातडीने तपासाची चक्रे फिरवली. सुरुवातीला डॉग स्कॉड आणि फॉरेन्सिक व्हॅनच्या मदतीने पुरावे गोळा करण्यात आले . त्यानंतर सायबर विभागाच्या तांत्रिक विंगचे सहाय्य घेत सीडीआर (CDR) तपासण्यात आला . या तांत्रिक तपासाच्या आधारे पोलिसांनी संशयितांचा माग काढला .
आरोपींना फिल्मी स्टाईलने पकडले
पोलिसांनी या घरफोडी प्रकरणी खालील दोन मुख्य आरोपींना ताब्यात घेतले आहे:
१) विजयकुमार प्रभू काळे (वय ३७ वर्ष): याला धाराशिव जिल्ह्यातील तेर (ता. धाराशिव) येथून ताब्यात घेण्यात आले .
२) डोगेश उर्फ भोगेश धुळाप्पा पवार (वय २४ वर्ष): मूळचा कमसुरनाईक तांडा (ता. आळंद, जि. कलबुर्गी) येथील रहिवासी असलेला व सध्या जेकेकूर शिवार (ता. उमरगा) येथे राहणाऱ्या या आरोपीला पोलिसांनी जेकेकूर शिवारातून पाठलाग करून शिताफीने अटक केली .
पोलिसी खाक्या दाखवताच दोन्ही आरोपींनी गुन्ह्याची कबुली दिली असून, हा गुन्हा त्यांनी आणखी एका साथीदाराच्या मदतीने केल्याचे तपासात समोर आले आहे . अटक करण्यात आलेल्या आरोपींकडून पोलिसांनी गुन्ह्यातील चोरी गेलेली १,०१,६०० रुपयांची रोकड हस्तगत केली आहे .
इतर गुन्ह्यांचीही कबुली
अटक करण्यात आलेल्या आरोपींनी यापूर्वी म्हणजेच मार्च २०२६ मध्ये उमरगा पोलीस ठाण्याच्या हद्दीतील बोरी (ता. उमरगा) येथेही घरफोडी करून चोरी केल्याची कबुली दिली आहे . त्यामुळे या टोळीकडून आणखी काही मोठे गुन्हे उघडकीस येण्याची शक्यता वर्तवली जात आहे.
या पथकाने केली कामगिरी:
सदर धडक कारवाई धाराशिवचे पोलीस अधीक्षक रितू खोकर, अपर पोलीस अधीक्षक सचिन पांडकर, उपविभागीय पोलीस अधिकारी सदाशिव शेलार यांच्या मार्गदर्शनाखाली करण्यात आली .
या मोहिमेत उमरगा पोलीस ठाण्याचे पोलीस निरीक्षक प्रल्हाद सूर्यवंशी, पोउपनि आर. एस. चाटे, पोलीस कर्मचारी श्रीकांत चौधरी, चौतन्य कोंगुलवार, कोळी, यासीन सय्यद, नवनाथ भोरे, योगेश बिराजदार तसेच ढोकी पोलीस ठाण्याचे खांडेकर व पाडे सहभागी होते . तसेच धाराशिव सायबर टेक्निकल विंगचे अशोक कदम, शुभम बिराजदार आणि सुनील मोरे यांनी तपासात विशेष तांत्रिक सहाय्य केले .
