तूळजापूरच्या विधानसभा निवडणुकीचं नाट्य म्हणजे एकदम रंगीत आणि खुसखुशीत झालं आहे! काँग्रेसनं आपल्या जुने, अनुभवी माजी आमदार मधुकरराव चव्हाण यांचा ‘नो एन्ट्री’ बोर्ड लावून नवख्या ऍड. धीरज पाटील यांना उमेदवारी दिली. हे धीरज पाटील म्हणजे गावाकडच्या लोकांना नवीन नाव; त्यांचा बायोडेटा अस्सल जिल्हाध्यक्षाच्या सिरीअलमध्ये नव्याने लिहिलेला. त्यांना नवा चेहरा समजून काँग्रेसने आशा ठेवल्या आहेत, पण तुळजापूरच्या मतदारांना, “हा चिरंजीव आप्पासाहेब पाटलांचा पोरगा, त्याला काय कळतं?” असा प्रश्न पडला असावा.
मधुकरराव चव्हाण मात्र नाराज! आजूबाजूला सगळीकडे कार्यकर्ते त्यांना भेटायला येतात आणि त्यांची विचारपूस करतात, “आण्णा , तुमचं काय झालं?” त्यावर ते सगळ्यांना सांगतात, “अहो, बाळांनो, तसं काही नाही. मी म्हातारा आहे, पण लढायची उमेद अजूनही आहे!” कधी लोकांना हसवत तर कधी डोळ्यांतलं पाणी लपवत, चव्हाण आण्णा सांगतात, “पाच वेळा लोकांनी मला निवडलं, आता मात्र पक्षानं विचार बदलला दिसतंय.” पण त्यांच्या मनात कुठेतरी असतं, “माझं राजकीय भविष्य असं का धूसर होतंय?” बघू, आता चव्हाण आण्णा राजकीय घराणेशाहीचा पराभव मान्य करणार का बंड करणार, ते काळच ठरवेल.
याचवेळी, या गोंधळात तिसरं पात्र देखील आहे – आमचे मुंबईचे उद्योगपती, राष्ट्रवादीचे नेता अशोक जगदाळे! या जगदाळे भाऊंनी दिल्लीपर्यंत फिल्डिंग लावली होती, पण काँग्रेसची जागा त्यांना मिळाली नाही. त्यांच्या डोक्यात नेहमी एकच विचार, “मी दिल्ली-मुंबई अशा ठिकाणी धावाधाव करतो, तुळजापूरकडची जागा मिळायला हवी.” मात्र, लातूरचे अमित देशमुख यांनी धीरज पाटलांना आशीर्वाद दिल्यामुळे जगदाळे भाऊंच्या स्वप्नावर पाणी पडलं ! आता जगदाळे भाऊ म्हणतात, “बंड करायचं की परत मुंबईच्या रस्त्याला लागायचं?”
काँग्रेसच्या गोटात झालेल्या ह्या बदलाने कार्यकर्त्यांमध्ये खुसपटं लागली आहेत. काही कार्यकर्ते धीरज पाटलांच्या बाजूने आहेत, काही मात्र चव्हाण आण्णाच्या सहानुभूतीत. काही जण आशेने जगदाळे भाऊंकडे बघतायत, तर काही त्यांना “बाईट” घेण्याच्या तयारीत आहेत.
तुळजापूर काँग्रेसचा गड मानला जातो, पण २०१९ साली भाजपने हा गड ताब्यात घेतला. त्यामुळे या निवडणुकीत धीरज पाटलांनी तुळजापूरचा गड परत मिळवायचा प्रयत्न करणार हे निश्चित आहे. त्याचबरोबर काँग्रेसमध्येच एक अघोषित स्पर्धा सुरु झाली आहे – चव्हाण समर्थकांनी धीरज पाटलांचे समर्थन करायचे का नकार द्यायचा, याच्यावर विचार करायला लागले आहेत.
ह्या सर्व कथानकात राजकीय चर्चांना फोडणी देण्यासाठी चहाच्या टपऱ्यांवर चर्चा रंगत आहेत. “अरे, पाटलांचं नाव दिलं म्हणजे झालं काय? आपला चव्हाण आण्णा तर जनतेचा हक्काचा नेता आहे!” काही जण म्हणतात, “जगदाळे भाऊ काय कमी नाहीत; ते बंड करतील तर नक्कीच मनोरंजन होईल!”
राजकीय रणसंग्रामात सध्या धीरज पाटील, चव्हाण आण्णा, आणि जगदाळे भाऊ यांचे वेगवेगळे डावपेंच पाहायला मिळत आहेत. शेवटी या सर्व नाट्यात कोण विजयी ठरेल? निवडणुकीच्या दिवशी मतदान पेटीतून उघड होणारं गुपितच तुळजापूरच्या जनतेला त्यांचं अंतिम उत्तर देईल.
पण एक गोष्ट नक्की – या निवडणुकीच्या खेळात कोणता पक्ष जिंकणार ह्याच्याइतकीच उत्सुकता ह्या पात्रांवर आधारित असलेल्या चर्चांनी घेतली आहे. जनता हसते, टाळ्या वाजवते, एकमेकांशी चर्चा करते आणि म्हणते, “काय सीन आहे रे बाबा तुळजापूरचा!”
– बोरूबहाद्दर
