नवी दिल्ली / धाराशिव: महिलांच्या आरोग्य सुरक्षेच्या दृष्टीने केंद्र सरकारने एक ऐतिहासिक निर्णय घेतला आहे. देशभरातील १४ वर्षांखालील मुलींना गर्भाशय मुखाच्या कर्करोगापासून (Cervical Cancer) बचाव करण्यासाठी ‘एचपीव्ही’ (HPV) लस आता मोफत दिली जाणार आहे. धाराशिवचे खासदार ओमराजे निंबाळकर यांनी लोकसभेत केलेल्या सातत्यपूर्ण पाठपुराव्याचे हे फलित मानले जात आहे.
खासदार निंबाळकर यांनी १९ डिसेंबर २०२५ रोजी लोकसभेत अनुक्रमांक १५५ अंतर्गत खाजगी विधेयक क्र. १९२/२०२५ सादर केले होते. या विधेयकाच्या माध्यमातून देशातील सर्व १४ वर्षांखालील मुलींना गर्भाशय मुखाच्या कर्करोगापासून संरक्षण देण्यासाठी राष्ट्रीय स्तरावर ही लस मोफत उपलब्ध करून देण्याची आग्रही मागणी त्यांनी केली होती.
गर्भाशय मुखाचा कर्करोग हा भारतातील महिलांमध्ये आढळणाऱ्या प्रमुख कर्करोगांपैकी एक आहे. ‘एचपीव्ही’ विषाणूमुळे होणाऱ्या या आजारावर प्रभावी प्रतिबंधक उपाय म्हणून लसीकरणाला जागतिक स्तरावर मान्यता आहे. संसदेत मांडण्यात आलेल्या या गंभीर विषयाची केंद्र सरकारने दखल घेत अखेर या देशव्यापी मोफत लसीकरण कार्यक्रमाला अधिकृत मंजुरी दिली आहे.
लसीकरण कार्यक्रमाची प्रमुख वैशिष्ट्ये:
-
मोफत लाभ: देशभरातील १४ वर्षांखालील सर्व मुलींना ‘एचपीव्ही’ लस संपूर्णपणे मोफत दिली जाईल.
-
अंमलबजावणी केंद्रे: लसीकरणाची मोहीम सर्व सरकारी रुग्णालये, जिल्हा रुग्णालये, समुदाय आरोग्य केंद्रे आणि आयुष्मान आरोग्य मंदिरांमार्फत राबवली जाईल.
-
व्यापक व्याप्ती: या ऐतिहासिक निर्णयामुळे देशातील ग्रामीण तसेच शहरी भागातील तब्बल १ कोटी २५ लाख मुलींना दरवर्षी मोफत आणि सुरक्षित आरोग्य संरक्षण उपलब्ध होणार आहे.
-
दीर्घकालीन संरक्षण: लहान वयातच लस मिळाल्यामुळे भविष्यात गर्भाशय मुखाच्या कर्करोगाचा धोका टळण्यास मदत होईल.
“१९ डिसेंबर २०२५ रोजी लोकसभेत मांडलेल्या विधेयक क्र. १९२/२०२५ च्या माध्यमातून मी देशातील मुलींच्या आरोग्य सुरक्षेचा अत्यंत महत्त्वाचा मुद्दा उपस्थित केला होता. केंद्र सरकारने यावर सकारात्मक निर्णय घेऊन लसीकरण मोफत केल्याबद्दल मी पंतप्रधान आणि केंद्रीय आरोग्य मंत्र्यांचे मनःपूर्वक आभार मानतो.”
– खा. ओमराजे निंबाळकर
महिलांच्या आरोग्याच्या दृष्टीने हा निर्णय एक मैलाचा दगड ठरणार असून, देशभरातून या निर्णयाचे स्वागत केले जात आहे.
