धाराशिव: धाराशिव शहर पोलीस ठाण्याच्या हद्दीतून माणुसकीला काळीमा फासणारी एक अत्यंत धक्कादायक आणि संतापजनक घटना समोर आली आहे. एका हॉटेलमध्ये पतीसोबत आराम करण्यासाठी जाणाऱ्या १९ वर्षीय विवाहितेवर चाकूचा धाक दाखवून लैंगिक अत्याचार करण्यात आल्याचा खळबळजनक प्रकार उघडकीस आला आहे. आरोपींनी पीडितेच्या पतीला चाकू दाखवून जीवे मारण्याची धमकी दिली आणि बेदम मारहाण केली. याप्रकरणी धाराशिव शहर पोलिसांत ॲट्रॉसिटी आणि बलात्काराचा गुन्हा दाखल करण्यात आला आहे.
पोलिसांकडून मिळालेल्या प्राथमिक माहितीनुसार, पीडित १९ वर्षीय महिला आणि तिचे पती २२ जून २०२६ रोजी रात्री ८:३० ते ९:०० वाजण्याच्या सुमारास एका हॉटेलमधील रूममध्ये आराम करण्यासाठी जात होते. त्याचवेळी हॉटेलमधील तीन नराधम तरुणांनी त्यांचा रस्ता अडवला.
पतीला चाकूचा धाक, विवाहितेवर अत्याचार
आरोपींनी अचानक पीडितेच्या पतीला घेरले आणि त्यांच्या गळ्याला चाकू लावून “आरडाओरडा केला तर जीवे ठार मारीन,” अशी धमकी दिली. पतीला चाकूचा धाक दाखवून कचाट्यात पकडल्यानंतर, त्यातील एका नराधम तरुणाने पीडित महिलेवर बळजबरीने लैंगिक अत्याचार केला.
या भयानक प्रकाराला पतीने विरोध करण्याचा प्रयत्न केला असता, इतर दोन आरोपी तरुणांनी पतीला लाथाबुक्क्यांनी आणि गंभीर शस्त्राने बेदम मारहाण केली. “हा झालेला प्रकार जर कोणाला सांगितला, तर तुमच्या कुटुंबाला जिवे संपवून टाकू,” अशी धमकी देऊन आरोपींनी तिथून पळ काढला.
ॲट्रॉसिटी आणि बलात्कारासह विविध कलमांन्वये गुन्हा दाखल
या धक्कादायक प्रसंगानंतर पीडित विवाहितेने २३ जून २०२६ रोजी धाराशिव शहर पोलीस ठाणे गाठून आरोपींविरुद्ध तक्रार दिली. पीडितेच्या प्रथम खबरीवरून पोलिसांनी तिन्ही आरोपींविरुद्ध भारतीय न्याय संहिता (BNS) कलम ६४(१) (बलात्कार), १२६(२), १२७(२) (बेकायदेशीर डांबून ठेवणे), ११८(१) (घातक शस्त्राने दुखापत करणे), ३२४(४), ३५१(२), ३५१(३) (जीवे मारण्याची धमकी), ३५२, ३(५) (समान उद्देश) सह अनुसूचित जाती आणि अनुसूचित जमाती (अत्याचार प्रतिबंधक) कायदा (Atrocity Act) कलम ३(१)(आर)(एस), ३(१)(डब्ल्यु)(i)(ii) आणि ३(२)(व्हिए) अन्वये गुन्हा नोंदवला आहे.
(पीडितेच्या सुरक्षेसाठी आणि कायद्यानुसार तिचे नाव व गाव गोपनीय ठेवण्यात आले आहे).
वरिष्ठ अधिकाऱ्यांकडून तपास सुरू:
शहरात हॉटेलमध्ये घुसून पती-पत्नीला ओलीस धरत कृत्य केल्याच्या या घटनेमुळे संपूर्ण जिल्ह्यात तीव्र संताप व्यक्त होत आहे. पोलिसांनी या प्रकरणाचा तपास अत्यंत वेगाने सुरू केला असून, हॉटेलमधील सीसीटीव्ही फुटेजच्या आधारे तिन्ही नराधम आरोपींचा माग काढला जात आहे.
