धाराशिव: हॉटेलमध्ये काम करणाऱ्या मुलाला मारहाण केल्याचा जाब विचारल्याच्या कारणावरून हॉटेल चालकाला लाथाबुक्क्यांनी व दगडाने मारहाण करून गंभीर जखमी केल्याची घटना येडशी (ता. जि. धाराशिव) येथे घडली आहे. या प्रकरणी धाराशिव ग्रामीण पोलीस ठाण्यात चौघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, येडशी येथील जनता विद्यालयासमोर सुरज चाँद पटेल (वय ४०) यांचे कोल्ड्रिंकचे हॉटेल आहे. २९ नोव्हेंबर २०२५ रोजी रात्री सव्वा आठच्या सुमारास आरोपी अशितोष बाळू शिंदे, अजय शिंदे, बंटी उर्फ शिरीष शिंदे आणि बाळू शिंदे (सर्व रा. येडशी) यांनी हॉटेलमध्ये येऊन सुरज पटेल यांच्या मुलाला मारहाण केली.
यावेळी सुरज पटेल यांनी ‘मुलाला का मारता?’ असे विचारले असता, आरोपींनी त्यांना शिवीगाळ करण्यास सुरुवात केली. तसेच चौघांनी मिळून त्यांना लाथाबुक्क्यांनी आणि दगडाने मारहाण केली, ज्यामध्ये ते गंभीर जखमी झाले. यावेळी भांडण सोडवण्यासाठी राजू चाँद पाशा शेख हे मध्यस्थी करण्यास आले असता, आरोपींनी त्यांनाही मारहाण केली आणि जिवे मारण्याची धमकी दिली.
या प्रकरणी जखमी सुरज पटेल यांनी २ डिसेंबर रोजी दिलेल्या फिर्यादीवरून धाराशिव ग्रामीण पोलीस ठाण्यात वरील चारही आरोपींविरुद्ध भारतीय न्याय संहिता (BNS) कलम ११८(२), ११८(१), ११५(२), ३५२, ३५१(२)(३) आणि ३(५) अन्वये गुन्हा दाखल करण्यात आला आहे. पुढील तपास पोलीस करत आहेत.
