येरमाळा : येथील प्रसिद्ध येडेश्वरी देवीच्या चैत्र पौर्णिमा यात्रेत अवैधरित्या जुगार खेळवणाऱ्यांवर येरमाळा पोलिसांनी धडक कारवाई केली आहे. गुरुवारी (ता. २) पोलिसांनी यात्रा परिसरात तीन वेगवेगळ्या ठिकाणी छापे टाकून जुगाराच्या साहित्यांसह रोख रक्कम जप्त केली असून, याप्रकरणी तिघांवर येरमाळा पोलीस ठाण्यात गुन्हे दाखल करण्यात आले आहेत.
सध्या येरमाळा येथे चैत्र पौर्णिमा यात्रेचा उत्साह आहे. यात्रेच्या पार्श्वभूमीवर कायदा व सुव्यवस्था राखण्यासाठी पोलिसांची करडी नजर आहे. दरम्यान, यात्रेत काही ठिकाणी अवैध जुगार सुरू असल्याची माहिती येरमाळा पोलिसांना मिळाली होती. यावरून पोलिसांच्या पथकाने गुरुवारी सकाळी ११ ते दुपारी ३ वाजेच्या सुमारास तीन वेगवेगळ्या ठिकाणी छापे टाकले.
अशी झाली कारवाई:
-
पहिली कारवाई: दुपारी २ वाजेच्या सुमारास येडेश्वरी यात्रेतील चुन्याचे रान परिसरातील मोकळ्या जागेत पोलिसांनी छापा टाकला. यावेळी सुरट मटका जुगार खेळवताना रतन उद्धव घनघाव (वय २४, रा. नित्रुड, ता. माजलगाव, जि. बीड) याला रंगेहाथ पकडण्यात आले. त्याच्याकडून ३८० रुपये व जुगाराचे साहित्य जप्त करण्यात आले.
-
दुसरी कारवाई: याच परिसरात (चुन्याचे रान) दुपारी ३ वाजता दुसरी कारवाई करण्यात आली. यामध्ये गणेश खेमाजी कांबळे (वय ७८, रा. पिपखेडा, ता. घनसावंगी, जि. जालना) याला जुगार खेळवताना पकडण्यात आले. त्याच्याकडून २३० रुपये आणि साहित्य जप्त केले.
-
तिसरी कारवाई: सकाळी ११ वाजेच्या सुमारास येडेश्वरी मंदिर परिसरातील मलकापूर टी पॉईंट येथे छापा टाकण्यात आला. येथे सचिन युवराज काळे (वय २४) हा जुगाराचा अड्डा चालवत असल्याचे आढळून आले. त्याच्या ताब्यातून पोलिसांनी जुगाराचे साहित्य आणि तब्बल ७ हजार २०० रुपयांची रोख रक्कम जप्त केली.
या कारवाईत पोलिसांनी जुगाराचे साहित्य आणि एकूण ७ हजार ८१० रुपयांची रोकड जप्त केली आहे. याप्रकरणी येरमाळा पोलीस ठाण्यात रतन घनघाव, गणेश कांबळे आणि सचिन काळे या तिघांविरुद्ध महाराष्ट्र जुगार प्रतिबंधक कायदा कलम १२ (अ) अन्वये तीन स्वतंत्र गुन्हे दाखल करण्यात आले आहेत. या धडक कारवाईमुळे यात्रा परिसरात अवैध धंदे करणाऱ्यांचे धाबे दणाणले आहेत.
