येरमाळा : येरमाळा पोलीस ठाण्याच्या हद्दीत मालमत्तेचे नुकसान केल्याच्या दोन मोठ्या घटनांची नोंद झाली आहे. एका घटनेत तेरखेडा शिवारातील पवनचक्कीमध्ये अज्ञातांनी तोडफोड करून तब्बल १० लाख रुपयांचे नुकसान केले आहे, तर दुसऱ्या घटनेत शासकीय परवानगीशिवाय अंगणवाडीची खोली पाडल्याप्रकरणी एका महिलेसह ग्रामपंचायत अधिकाऱ्यावर गुन्हा दाखल करण्यात आला आहे.
पवनचक्कीमध्ये १० लाखांची तोडफोड
पहिल्या घटनेत, मौजे तेरखेडा शिवारातील एका शेतामधील पवनचक्कीला अज्ञात व्यक्तींनी लक्ष्य केले. दिनांक ११ ऑगस्ट २०२५ रोजी रात्री ८ ते १२ ऑगस्ट २०२५ रोजी सकाळी ८ वाजेच्या दरम्यान ही घटना घडली. अज्ञात व्यक्तींनी पवनचक्कीच्या गेटचा दरवाजा तोडून आत प्रवेश केला आणि तेथील सिमंस गमेशा स्विच गेयर बॉक्स केबीन, एसएफ ६ ब्रेकर, एमव्ही केबल, स्टार्टर, कन्व्हर्टर, जनरेटर अशा महागड्या साहित्याची तोडफोड केली. या तोडफोडीमध्ये कंपनीचे अंदाजे १०,००,००० रुपयांचे मोठे आर्थिक नुकसान झाले आहे.
याप्रकरणी दत्तात्रय शिवाजी माने (वय ४० वर्षे, रा. शिरगाव, ता. वाई, जि. सातारा) यांनी २८ ऑगस्ट रोजी येरमाळा पोलीस ठाण्यात फिर्याद दिली. त्यांच्या फिर्यादीवरून पोलिसांनी अज्ञात आरोपींविरोधात भारतीय न्याय संहिता कलम ३२४(४) आणि ३२४(५) अन्वये गुन्हा नोंदवला असून, पुढील तपास सुरू केला आहे.
शासकीय अंगणवाडी पाडली, महिलेसह अधिकाऱ्यावर गुन्हा
दुसऱ्या घटनेत, येरमाळा येथील गट क्रमांक ३७७/२५४ मधील शासकीय अंगणवाडीची खोली बेकायदेशीरपणे पाडल्याचा धक्कादायक प्रकार समोर आला आहे. शासनाची कोणतीही पूर्वपरवानगी न घेता किंवा निर्लेखनाची कायदेशीर प्रक्रिया न राबवता ही खोली पाडण्यात आली. यामुळे शासनाचे १,५०,००० रुपयांचे नुकसान झाले.
ही घटना ९ ऑक्टोबर २०२४ रोजी सकाळी ११ वाजता घडल्याचे फिर्यादीत म्हटले आहे. याप्रकरणी कळंब पंचायत समितीचे विस्तार अधिकारी दत्तात्रय त्रंबक साळुंके (वय ५५ वर्षे) यांनी २८ ऑगस्ट २०२५ रोजी फिर्याद दिली आहे. त्यांच्या फिर्यादीवरून सौ. मंदाकिनी आबासाहेब बारकुल (रा. येरमाळा) आणि ग्रामपंचायत अधिकारी राजेंद्र एकनाथ हांडे यांच्या विरोधात गुन्हा दाखल करण्यात आला आहे. आरोपींवर भारतीय न्याय संहिता कलम ३२४(३), ३२४(५) सह भूमी महसूल कायदा कलम ५०, ५२ आणि सार्वजनिक संपत्ती हानी प्रतिबंधक कायद्यान्वये गुन्हा नोंदवण्यात आला आहे.
या दोन्ही प्रकरणांमुळे परिसरात खळबळ उडाली असून, येरमाळा पोलीस अधिक तपास करत आहेत.
