येरमाळा : प्रसिद्ध श्री क्षेत्र येडेश्वरी देवीच्या मंदिर परिसरात खेट्यानिमित्त मोठी गर्दी जमली असताना, अज्ञात चोरट्याने भाविकाच्या अंगावरील तब्बल १ लाख ४० हजार रुपये किमतीचे सोन्याचे दागिने चोरून नेल्याची घटना घडली आहे. याप्रकरणी येरमाळा पोलीस ठाण्यात गुन्हा दाखल करण्यात आला आहे.
नेमकी घटना काय?
सोलापूर जिल्ह्यातील बार्शी तालुक्यातील सावरगाव येथील रहिवासी राहुल सदाशिव गर्जे (वय ३४ वर्षे) हे आपली आई आणि पुतणीसह दिनांक २८ ऑगस्ट २०२६ रोजी सकाळी १०.५० ते ११.३० वाजेच्या सुमारास येरमाळा येथील येडेश्वरी मंदिर परिसरात आले होते.
त्या वेळी ते मंदिरात खेट्याचा दोरा बांधत असताना भाविकांची प्रचंड गर्दी जमली होती. याच गर्दीचा गैरफायदा घेत अज्ञात चोरट्याने राहुल गर्जे यांच्या जवळील एकूण १ लाख ४० हजार रुपये किमतीचे सोन्याचे दागिने शिताफीने लांबवले. गर्दीत दागिने चोरीला गेल्याचे लक्षात आल्यानंतर त्यांनी परिसरात शोधाशोध केली, मात्र चोरट्याचा पत्ता लागला नाही.
येरमाळा पोलिसांत गुन्हा नोंद
याप्रकरणी राहुल गर्जे यांनी १ सप्टेंबर २०२६ रोजी येरमाळा पोलीस ठाण्यात येऊन फिर्याद दिली. त्यांच्या प्रथम खबरेवरून येरमाळा पोलिसांनी अज्ञात आरोपीविरुद्ध भारतीय न्याय संहिता (BNS) कलम ३०४ आणि ३(५) अन्वये चोरीचा गुन्हा नोंदवला आहे. मंदिर परिसरातील सीसीटीव्ही फुटेजच्या आधारे पोलिसांनी चोरट्याचा शोध सुरू केला असून, पुढील तपास येरमाळा पोलीस करत आहेत.
