धाराशिव – धाराशिव नगर पालिकेत मागील पाच वर्षात मोठ्या प्रमाणात भ्रष्ट्राचार, गैरव्यवहार, अनियमितता झाली असून, याप्रकरणी तत्कालीन मुख्याधिकारी हरिकल्याण येलगट्टे यांच्यावर सात तर लेखापाल सुरज बोर्डे यांच्यावर दोन गुन्हे दाखल झाले आहेत. गुंठेवारी प्रकरणी आणखी एक गुन्हा दाखल होण्याची शक्यता आहे.
धाराशिव नगर पालिकेतील २७ कोटीच्या कथित अनियमितता आणि गैरव्यवहार प्रकरणी आनंदनगर पोलीस स्टेशनमध्ये १४ ऑगस्ट २०२३ रोजी गुन्हा दाखल करण्यात आला आहे. दि.06.07.2020 ते दि.21.11.2022 पावेतो नगर परिषद धाराशिव येथे एकुण 1088 प्रमाणके शासकीय अभिलेख आहे. हे माहित असताना व ते लेखाविभागात जतन करुन ठेवणे बंधनकारक असताना ती ठेवली नाहीत आणि विविध विकास योजना व इतर आनुषंगीक खर्चाबाबतचे एकुण 514 प्रमाणके ज्याची एकुण 27,38,78,100 ₹ रक्कमेचा अपहार करुन तो दडपण्याच्या उद्देशाने प्रमाणके जाणीवपूर्वक लेखा विभागात ठेवले नाहीत अशा मजकुराच्या फिर्यादी नामे- अशोक कलेश्वर फरताडे, वय 31 वर्षे, धंदा लेखापाल नगर परिषद धाराशिव ( रा.मस्सा खंडेश्वरी ता. कळंब हा.मु. समर्थ नगर धाराशिव ) यांनी दि.14.08.2023 रोजी सरकारतर्फे दिलेल्या प्रथम खबरेवरुन आनंदनगर पो ठाणे येथे भा. दं. वि. सं. कलम- 420, 409, 34, 201 सह महाराष्ट्र सार्वजनिक अभिलेख अधि कलम 9 अन्वये गुन्हा नोंदवला आहे.
पैकी कोरोना काळातील ५ लाख आणि ९७ लाखाची बिले उचललेली दोन प्रमाणके गायब आहेत. कोरोनाच्या नावावर १ कोटी कोणाच्या घश्यात गेले असा प्रश्न विचारला जात आहे. एका राजकीय नेत्याच्या भावाने खोटी बिले तयार करून नगर पालिकेला लुटल्याची चर्चा सुरु आहे. या संपूर्ण प्रकरणाची चौकशी करावी, अशी मागणी होत आहे.
