उमरगा : उमरगा शहरातील एकोंडी रोड परिसरात लोकांच्या जीवितास धोका निर्माण होईल अशा पद्धतीने विनापरवाना लोखंडी कोयता बाळगणाऱ्या तरुणाविरुद्ध उमरगा पोलिसांनी कारवाई केली. पोलिसांनी कोयता जप्त करून संबंधिताविरुद्ध शस्त्र कायद्यानुसार गुन्हा दाखल केला आहे.
पोलिसांनी दिलेल्या माहितीनुसार, गणेश गोपाळ मडोळे (वय २५, रा. सानेगुरुजी नगर, उमरगा) हा ३१ ऑक्टोबर २०२६ रोजी सायंकाळी सुमारे ६.४० वाजता उमरगा येथील एकोंडी रोड परिसरात लोखंडी कोयता घेऊन फिरत असल्याचे पोलिसांच्या निदर्शनास आले.
सदर कोयता विनापरवाना व बेकायदेशीररीत्या जवळ बाळगल्याचे आढळून आल्याने पोलिसांच्या पथकाने अंदाजे ५०० रुपये किमतीचा लोखंडी कोयता जप्त केला.
याप्रकरणी उमरगा पोलीस ठाण्यातील पोलीस अंमलदार बळीराम सोनटक्के यांनी दिलेल्या फिर्यादीवरून गणेश मडोळे याच्याविरुद्ध शस्त्र कायदा कलम ४ व २५ अन्वये गुन्हा दाखल करण्यात आला आहे. पुढील तपास उमरगा पोलीस करीत आहेत.
