वाशी – तालुक्यातील खानापूर येथे एका बंद घराचे कुलूप तोडून अज्ञात चोरट्यांनी सोन्याचे दागिने आणि रोख रक्कम असा एकूण १ लाख ८६ हजार रुपयांचा मुद्देमाल चोरून नेल्याची घटना घडली आहे. दिवसाढवळ्या झालेल्या या धाडसी चोरीमुळे परिसरात भीतीचे वातावरण पसरले आहे. याप्रकरणी वाशी पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
अविनाश आण्णासाहेब झांबरे (वय ३६, रा. खानापूर) यांनी यासंदर्भात फिर्याद दिली आहे. झांबरे कुटुंबीय गुरुवारी, २६ जून रोजी सकाळी १० ते सायंकाळी ७ वाजण्याच्या दरम्यान कामानिमित्त घराबाहेर गेले होते. हीच संधी साधून अज्ञात चोरट्यांनी त्यांच्या बंद घराच्या दरवाजाचे कुलूप तोडून आतमध्ये प्रवेश केला.
घरात शिरल्यानंतर चोरट्यांनी लोखंडी कपाटात ठेवलेले ९३ ग्रॅम वजनाचे सोन्याचे दागिने आणि ३० हजार रुपयांची रोकड असा एकूण १ लाख ८६ हजार रुपयांचा ऐवज लंपास केला. सायंकाळी घरी परतल्यानंतर अविनाश झांबरे यांना घराचे कुलूप तुटलेले दिसले आणि घरातील सामान अस्ताव्यस्त पडलेले आढळले. कपाट तपासले असता चोरीचा प्रकार उघडकीस आला.
या घटनेनंतर अविनाश झांबरे यांनी शनिवारी, २८ जून रोजी वाशी पोलीस ठाण्यात तक्रार दाखल केली. त्यांच्या फिर्यादीवरून पोलिसांनी भारतीय न्याय संहितेच्या कलम ३३१(३), ३०५(ए), आणि ३(५) अन्वये अज्ञात आरोपींविरोधात गुन्हा नोंदवला आहे. वाशी पोलीस या प्रकरणाचा अधिक तपास करत आहेत.
