धाराशिव – शेतकऱ्यांकडून लाखो रुपयांचे सोयाबीन खरेदी करून त्यांना पैसे न देता त्यांची फसवणूक केल्याप्रकरणी दोघा जणांविरुद्ध धाराशिव ग्रामीण पोलीस ठाण्यात गुन्हा दाखल करण्यात आला आहे. या घटनेत एकूण २३ शेतकऱ्यांना तब्बल ६१ लाख ९३ हजार ८८ रुपयांना गंडा घालण्यात आला आहे.
पोलिसांनी दिलेल्या माहितीनुसार, प्रशांत विलास जाधव (रा. बावी, ता. जि. धाराशिव) आणि प्रमोद अशोक माने (रा. सावरगाव, ता. तुळजापूर) अशी गुन्हा दाखल झालेल्या आरोपींची नावे आहेत. याप्रकरणी रविंद्र रंगनाथ उंडे (वय ५९, रा. बावी) यांनी फिर्याद दिली आहे.
फिर्यादीनुसार, ही घटना २५ ऑक्टोबर २०२३ रोजी सकाळी ११ वाजण्याच्या सुमारास बावी येथे घडली. आरोपी प्रशांत जाधव आणि प्रमोद माने यांनी फिर्यादी रविंद्र उंडे व इतर २२ शेतकऱ्यांकडून एकूण ६१,९३,०८८ रुपये किमतीचे सोयाबीन खरेदी केले होते. मात्र, माल खरेदी केल्यानंतर त्यांनी शेतकऱ्यांना ठरलेली रक्कम दिली नाही.
वारंवार पैशाची मागणी करूनही आरोपींनी पैसे देण्यास टाळाटाळ केल्याने अखेर आपली फसवणूक झाल्याचे शेतकऱ्यांच्या लक्षात आले. यानंतर, रविंद्र उंडे यांनी गुरुवारी, १० जुलै २०२५ रोजी धाराशिव ग्रामीण पोलीस ठाण्यात तक्रार दाखल केली.
रविंद्र उंडे यांच्या फिर्यादीवरून पोलिसांनी आरोपी प्रशांत जाधव आणि प्रमोद माने यांच्या विरोधात भारतीय दंड विधान कलम ४२० (फसवणूक), ४०६ (विश्वासघात) आणि ३४ (समान उद्देशाने कट रचणे) अन्वये गुन्हा नोंदवला आहे. या प्रकरणाचा पुढील तपास पोलीस करत आहेत. ऐन गरजेच्या वेळी शेतकऱ्यांच्या कष्टाचे पैसे बुडवल्याने परिसरात संताप व्यक्त होत आहे.
