धाराशिव: धाराशिवमधील भाजप भवनाच्या जागेवरून आणि स्वतःचे पक्ष कार्यालय नसल्यावरून उठलेल्या वादंगानंतर अखेर भाजप प्रशासनाला जाग आली आहे. ‘धाराशिव लाईव्ह‘ने यासंदर्भात बातमी प्रसिद्ध करून निष्ठावंत कार्यकर्त्यांची घुसमट आणि पक्ष कार्यालयाचा प्रश्न ऐरणीवर आणला होता. या बातमीची गंभीर दखल घेत भाजपचे जिल्हा सरचिटणीस ॲड. नितीन भोसले यांनी पक्षाची अधिकृत भूमिका स्पष्ट करत खुलासा केला आहे.
भाजप कार्यालयाच्या बांधकामासंदर्भात काही तांत्रिक परवानग्या बाकी होत्या, ज्या आता पूर्ण झाल्या आहेत. तसेच, इमारतीच्या बांधकाम रचनेमध्ये (Architectural Plan) काही आवश्यक बदल सुचवण्यात आले होते, ते बदलदेखील पूर्ण करण्यात आले आहेत, अशी माहिती ॲड. नितीन भोसले यांनी दिली.
येत्या काही दिवसांतच इमारतीचा कार्यारंभ आदेश (Work Order) देऊन पक्षाच्या वरिष्ठ नेत्यांच्या हस्ते व उपस्थितीत प्रत्यक्ष बांधकामाला दणक्यात सुरुवात केली जाईल, असा दावा भाजप नेतृत्वाने केला आहे.
‘धाराशिव लाईव्ह‘च्या बातमीनंतर चक्रे वेगाने फिरली असून, निष्ठावंतांच्या दीर्घकालीन मागणीला अखेर यश मिळताना दिसत आहे. आता प्रत्यक्ष भूमीपूजन आणि बांधकाम कधी सुरू होते, याकडे संपूर्ण जिल्ह्याचे लक्ष लागले आहे.
