परंडा : पत्र्याच्या शेडची खिडकी आतून बसवायची की बाहेरून, यावरून झालेल्या क्षुल्लक वादाचे पर्यवसान एका तरुणावर कोयता आणि विटांनी केलेल्या जीवघेण्या हल्ल्यात झाल्याची धक्कादायक घटना परंडा शहरात घडली आहे. ही घटना २६ जुलै रोजी मध्यरात्री दीडच्या सुमारास देवगाव रस्त्यावरील प्रेरणा नगर येथे घडली.
याप्रकरणी मुज्जमिल नसीम पटेल (वय ३५, रा. आसु, ता. परंडा) यांनी फिर्याद दिली आहे. पोलिसांनी दिलेल्या माहितीनुसार, मुज्जमिल पटेल आणि आरोपी सोहेल मकसुद सय्यद (रा. दर्गा रोड, परंडा) यांच्यात पत्र्याच्या शेडची खिडकी बसवण्यावरून वाद झाला. या वादातून सोहेल सय्यद आणि त्याच्या इतर तीन साथीदारांनी मुज्जमिल यांना शिवीगाळ करण्यास सुरुवात केली.
त्यानंतर प्रकरण चिघळले आणि आरोपींनी मुज्जमिल यांना लाथाबुक्क्यांनी मारहाण करण्यास सुरुवात केली. एवढ्यावरच न थांबता, आरोपींनी कोयता आणि विटांनी हल्ला करून त्यांना जखमी केले आणि जीवे ठार मारण्याची धमकी दिली.
या हल्ल्यानंतर मुज्जमिल पटेल यांनी २७ जुलै रोजी परंडा पोलीस ठाण्यात तक्रार दाखल केली. त्यांच्या फिर्यादीवरून पोलिसांनी मुख्य आरोपी सोहेल मकसुद सय्यद व त्याच्या तीन अज्ञात साथीदारांविरोधात भारतीय न्याय संहितेच्या कलम ११८(१), ११५(२), ३५२, ३५१(२) आणि ३(५) अन्वये गुन्हा नोंदवला आहे. पोलीस आरोपींचा शोध घेत असून, या प्रकरणाचा अधिक तपास करत आहेत.
