धाराशिव : राज्यात पुन्हा सक्रिय झालेल्या मान्सूनमुळे धाराशिव जिल्ह्यात झालेल्या अतिवृष्टी आणि पूरस्थितीमुळे शेतकऱ्यांच्या पिकांचे मोठ्या प्रमाणावर नुकसान झाले आहे. या पार्श्वभूमीवर, राज्याचे कृषीमंत्री दत्तात्रय भरणे यांनी आज जिल्ह्याच्या नुकसानग्रस्त भागांचा दौरा करून परिस्थितीची पाहणी केली. चिखल आणि पाण्यातून थेट शेतकऱ्यांच्या बांधावर जाऊन त्यांनी शेतकऱ्यांना धीर दिला आणि प्रशासनाला येत्या तीन दिवसांत पीक नुकसानीचे पंचनामे पूर्ण करून अहवाल सादर करण्याचे कडक निर्देश दिले.
गेल्या काही दिवसांपासून राज्यात पावसाने जोर धरला असून, धाराशिव जिल्ह्यातही मुसळधार पाऊस पडत आहे. यामुळे जिल्ह्यातील तेरणा आणि मांजरा नद्यांना पूर आला असून, पुराचे पाणी शेतात शिरल्याने पिकांचे मोठे नुकसान झाले आहे. या गंभीर परिस्थितीची दखल घेत कृषीमंत्री भरणे यांनी आज जिल्ह्याचा दौरा केला.
या दौऱ्यात त्यांनी वाशी तालुक्यातील घोडकी गावात प्रत्यक्ष शेतात जाऊन पिकांच्या नुकसानीची पाहणी केली. तसेच, कळंब तालुक्यातील खोंदला येथे पुराच्या पाण्यात घर वाहून गेलेल्या एका शेतकरी कुटुंबाची भेट घेऊन त्यांना धीर दिला. वाशी शहरातील दुकानांमध्ये पाणी शिरल्याने झालेल्या नुकसानीचाही त्यांनी आढावा घेतला.
शासन शेतकऱ्यांच्या पाठीशी ठामपणे उभे – दत्तात्रय भरणे
शेतकऱ्यांशी संवाद साधताना कृषीमंत्री म्हणाले, “शेतकरी हा राज्याच्या अर्थव्यवस्थेचा कणा आहे. निसर्गाच्या या प्रकोपामुळे शेतकरी संकटात सापडला आहे, पण या कठीण प्रसंगी शासन त्यांच्या पाठीशी ठामपणे उभे आहे. शेतकऱ्यांच्या दुःखात आम्ही सहभागी असून, त्यांना तातडीने मदत आणि दिलासा पोहोचवणे हे आमचे कर्तव्य आहे.” नुकसानभरपाई व आवश्यक मदत लवकरात लवकर केली जाईल, असे आश्वासनही त्यांनी दिले.
यावेळी शेतकऱ्यांनी पीक नुकसानीसह, जनावरांच्या चाऱ्याची कमतरता आणि घरांच्या नुकसानीच्या समस्या कृषीमंत्र्यांपुढे मांडल्या. शेतकऱ्यांना विमा हप्ता, पीक कर्ज पुनर्नियोजन आणि बियाणे व औषधांची उपलब्धता यासाठी आवश्यक ती सर्व पावले उचलली जातील, असेही श्री. भरणे यांनी सांगितले.
या पाहणी दौऱ्यात माजी आमदार राहुल मोटे यांच्यासह कृषी आणि महसूल विभागाचे अधिकारी उपस्थित होते.
