कळंब: कळंब तालुक्यातील मोहा येथे स्मशानभूमीच्या जागेची हद्द निश्चित करण्यासाठी गेलेल्या महसूल आणि पोलीस प्रशासनाच्या पथकावर जमावाने हल्ला केल्याची धक्कादायक घटना घडली आहे. मंगळवारी (दि. २६ ऑगस्ट) दुपारी साडेबाराच्या सुमारास झालेल्या या घटनेत जमावाने गोफणीने आणि हाताने दगडफेक केली, ज्यात ४ ते ५ पोलीस कर्मचारी जखमी झाले. याप्रकरणी १० जणांसह अन्य ३० ते ३५ जणांच्या जमावावर शासकीय कामात अडथळा आणल्याप्रकरणी कळंब पोलीस ठाण्यात गुन्हा दाखल करण्यात आला आहे.
याप्रकरणी पोलीस अंमलदार गोविंद राजाभाऊ मोटेगावकर यांनी फिर्याद दिली आहे. पोलिसांनी दिलेल्या माहितीनुसार, मोहा गावातील गट क्रमांक ५२९ मधील गावठाण जमिनीवर पारधी समाजासाठी स्मशानभूमीची हद्द निश्चित करण्याचे काम तहसीलदार आणि महसूल विभागामार्फत सुरू होते. यावेळी कायदा व सुव्यवस्था राखण्यासाठी पोलीस पथकही तैनात होते.
हद्द निश्चितीचे काम सुरू असताना, रमेश काळे, बापू काळे, शहाजी काळे यांच्यासह ३५ ते ४० जणांच्या जमावाने बेकायदेशीररित्या एकत्र येऊन शासकीय कामात अडथळा आणला. त्यांनी पोलीस कर्मचारी आणि उपस्थित गावकऱ्यांवर गोफणीने व हाताने दगडफेक करण्यास सुरुवात केली. या हल्ल्यात फिर्यादी मोटेगावकर यांच्यासह ४ ते ५ पोलीस कर्मचारी जखमी झाले.
या घटनेनंतर गोविंद मोटेगावकर यांनी दिलेल्या तक्रारीवरून कळंब पोलिसांनी १० नामनिर्देशित आरोपींसह एकूण ३५ ते ४० जणांवर भारतीय न्याय संहिता (भा.न्या.सं.) कलम १३२, १८९(२), १९१(२), १९०, १२१(१) आणि महाराष्ट्र पोलीस कायदा कलम १३५ अन्वये गुन्हा नोंदवला आहे. कळंब पोलीस या प्रकरणाचा अधिक तपास करत आहेत.
