धाराशिव: धाराशिव नगर परिषद निवडणुकीचे वातावरण तापले असून, मतदानाच्या तोंडावर आता ‘ईव्हीएम’ मशीनवरील चिन्हांच्या क्रमांकावरून मोठा वाद निर्माण झाला आहे. राष्ट्रवादी काँग्रेस पार्टी शरदचंद्रजी पवार पक्षाच्या उमेदवाराचे चिन्ह एक नंबरवरून दोन नंबरवर गेल्याने पक्षातर्फे संताप व्यक्त केला जात आहे. या प्रकारावर पक्षाचे प्रदेश सचिव मसूद शेख यांनी तीव्र शब्दात हल्लाबोल करत, हा सत्ताधाऱ्यांचा ‘रडीचा डाव’ असल्याचा गंभीर आरोप केला आहे.
धाराशिव नगर परिषदेच्या नगराध्यक्ष पदासाठी राष्ट्रवादी काँग्रेस पार्टी शरदचंद्रजी पवार पक्षातर्फे परवीन खलिफा कुरेशी या निवडणूक लढवत आहेत. त्यांचे अधिकृत चिन्ह ‘तुतारी फुंकणारा माणूस’ हे आहे. मात्र, ऐन निवडणुकीच्या तोंडावर मतदान मशीनवर (EVM) हे चिन्ह एक नंबरवरून दोन नंबरवर हलवण्यात आल्याचा प्रकार समोर आला आहे. या बदलामुळे विरोधकांनी प्रशासनावर आणि सत्ताधारी पक्षावर प्रश्नचिन्ह उपस्थित केले आहे.
ही लढाई आता ‘जनता विरुद्ध सत्ताधारी पक्ष’
या प्रकाराचा निषेध करताना राष्ट्रवादी शरदचंद्रजी पवार पक्षाचे प्रदेश सचिव मसूद शेख यांनी सत्ताधाऱ्यांवर कडाडून टीका केली. ते म्हणाले की, “ही निवडणूक आता केवळ राजकीय पक्षांमधील राहिलेली नसून, ती ‘जनता विरुद्ध सत्ताधारी पक्ष’ अशी लढाई झाली आहे. समोर स्पष्ट पराभव दिसत असल्यामुळेच राजकीय दबाव आणून प्रशासकीय पातळीवर हे बदल घडवून आणले जात आहेत.”
दडपशाही विरुद्ध पेटून उठा
निवडणुकीच्या तोंडावर उमेदवारांच्या चिन्हाचा किंवा नावाचा क्रम बदलणे हा शुद्ध ‘रडीचा डाव’ असल्याचे शेख यांनी म्हटले आहे. तसेच, जनतेने आता अधिक जागरूक आणि सतर्क राहण्याची गरज असून, या दडपशाही विरुद्ध पेटून उठण्याचे आवाहनही त्यांनी यावेळी केले.या प्रकारामुळे राजकीय वर्तुळात मोठी खळबळ उडाली असून, प्रशासन यावर काय स्पष्टीकरण देते याकडे सर्वांचे लक्ष लागले आहे.
