धाराशिव: धाराशिव नगर परिषद निवडणुकीच्या रणधुमाळीत शिवसेना (उद्धव बाळासाहेब ठाकरे) आणि काँग्रेस आघाडीने प्रचारात आघाडी घेतली आहे. आघाडीच्या नगराध्यक्षपदाच्या उमेदवार सौ. संगीताताई गुरव आणि इतर उमेदवारांच्या प्रचारार्थ आयोजित जाहीर सभेत आमदार कैलास पाटील यांनी विरोधकांवर जोरदार हल्लाबोल केला. “सध्या विकासाच्या गप्पा मारणाऱ्यांनी, आम्ही मंजूर केलेल्या निधीला स्थगिती का दिली? याचे आधी उत्तर द्यावे आणि मगच विकासावर बोलावे,” अशा शब्दांत आमदार पाटील यांनी विरोधकांना खडे बोल सुनावले.
यावेळी बोलताना आमदार कैलास पाटील यांनी ठाकरे सरकारच्या काळात मंजूर झालेला निधी शिंदे-फडणवीस सरकार सत्तेत आल्यावर कसा जाणीवपूर्वक अडवण्यात आला, याचा पाढाच वाचून दाखवला. ते म्हणाले की, “शहरातील जिजामाता उद्यान आणि छत्रपती संभाजीराजे उद्यानाच्या सुशोभीकरणासाठी महाविकास आघाडी सरकारच्या काळात ७ कोटी रुपयांचा निधी मंजूर करण्यात आला होता. मात्र, राज्यात सत्ताबदल होताच या कामाला स्थगिती देण्यात आली. आठवडी बाजारासाठी आलेला १० कोटींचा निधीही याच पद्धतीने अडवण्यात आला.”
तुळजाभवानी स्टेडियमसाठी मंजूर झालेला १० कोटी रुपयांचा निधी देखील रोखण्यात आल्याचा आरोप त्यांनी केला. शहरातील रस्त्यांच्या दुरावस्थेवर बोलताना आमदार पाटील यांनी गंभीर आरोप केला. ते म्हणाले, “शहरातील रस्त्यांसाठी तब्बल १४० कोटींचा निधी मंजूर होता. परंतु, केवळ एका ‘लाडक्या कंत्रादारास’ हे काम मिळावे, यासाठी १८ महिने काम होऊ दिले नाही. त्यामुळे शहराचा विकास कुणामुळे खुंटला, हे जनतेला आता समजले आहे.”
या जाहीर सभेत आमदार कैलास पाटील यांनी मांडलेल्या विकासकामांच्या लेखाजोखामुळे विरोधकांची कोंडी झाली असून, उपस्थित जनसमुदायाने आघाडीच्या उमेदवारांना मोठा प्रतिसाद दिला.
