भूम: सामायिक विहिरीवरील मोटर चालू करण्यासाठी गेलेल्या शेतकऱ्याला अडवून जबर मारहाण केल्याची घटना भूम तालुक्यातील वाकवड येथे घडली आहे. विशेष म्हणजे, हे भांडण सोडवण्यासाठी आलेल्या शेतकऱ्याच्या दिव्यांग (अपंग) पत्नीलाही आरोपींनी मारहाण करून जिवे मारण्याची धमकी दिली. याप्रकरणी भूम पोलीस ठाण्यात एकाच कुटुंबातील सात जणांविरुद्ध गुन्हा दाखल करण्यात आला आहे.
याबाबत सविस्तर वृत्त असे की, वाकवड (ता. भूम, जि. धाराशिव) येथील शेत गट नं. ९० मध्ये हरीचंद्र सोमनाथ टकले (वय ४१) हे २४ डिसेंबर २०२५ रोजी सकाळी १०:३० वाजण्याच्या सुमारास आपल्या सामायिक विहिरीवरील विद्युत मोटर चालू करण्यासाठी गेले होते. त्यावेळी आरोपींनी “आमच्या शेतात यायचे नाही” असे म्हणून त्यांना अडवले.
त्यानंतर आरोपींनी गैरकायद्याची मंडळी जमवून फिर्यादी हरीचंद्र टकले यांना शिवीगाळ करत लाथाबुक्यांनी, तसेच दगड व कोयत्याने मारहाण करून जखमी केले. यावेळी फिर्यादी यांची पत्नी हे भांडण सोडवण्यासाठी मध्ये आल्या असता, त्या दिव्यांग आहेत हे माहित असूनही आरोपींनी त्यांनाही शिवीगाळ व मारहाण केली. तसेच दोघांनाही जिवे ठार मारण्याची धमकी दिली.
या प्रकरणी हरीचंद्र सोमनाथ टकले यांनी दिलेल्या फिर्यादीवरून भूम पोलीस ठाण्यात खालील सात आरोपींविरुद्ध गुन्हा दाखल करण्यात आला आहे:
१. विकास आण्णा टकले २. अभिजीत विकास टकले ३. भारत विकास टकले ४. मंगल विकास टकले ५. राधा भारत टकले ६. सखुबाई श्रीमंत टकले ७. आण्णा देवराव टकले (सर्व रा. वाकवड, ता. भूम)
पोलिसांनी या सर्व आरोपींविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(३), १८९(२), १९१(२), १९० तसेच अपंग व्यक्तीचे अधिकार अधिनियम २०१६ चे कलम ९२ (अ) आणि ९२ (ब) अन्वये गुन्हा नोंदवला असून पोलीस पुढील तपास करत आहेत.
