नळदुर्ग: दुसरे लग्न केल्याच्या रागातून आणि पत्नीचे कुटुंब नियोजन ऑपरेशन न केल्याच्या क्षुल्लक कारणावरून पोटच्या मुलानेच बापाच्या डोक्यात दगड घालून निर्घृण हत्या केल्याची खळबळजनक घटना उघडकीस आली आहे. तुळजापूर तालुक्यातील अणदूर शिवारातील चिकणी तांडा येथे ही घटना १६ जानेवारी २०२६ रोजी घडली.
महिपती आंबाजी सुरवसे (वय ४५, रा. मानेवाडी, ता. तुळजापूर) असे हत्या झालेल्या दुर्दैवी वडिलांचे नाव आहे. तर धुळप्पा महिपती सुरवसे (रा. मानेवाडी) असे आरोपी मुलाचे नाव आहे.
पोलिसांनी दिलेल्या माहितीनुसार, मयत महिपती सुरवसे यांनी दुसरे लग्न केले होते. तसेच त्यांनी आपली दुसरी पत्नी इराप्पा हिचे कुटुंब नियोजनाचे ऑपरेशन केले नाही, याचा राग आरोपी मुलगा धुळप्पा याच्या मनात होता. याच कारणावरून १६ जानेवारी रोजी सायंकाळी ५.३० वाजेच्या सुमारास अणदूर शिवारातील चिकणी तांडा येथील शेतात वाद झाला. या वादाचे रूपांतर हाणामारीत होऊन आरोपी धुळप्पा याने वडील महिपती यांच्या डोक्यात दगड घालून त्यांना जागीच ठार मारले.
याप्रकरणी मयताची आई लक्ष्मीबाई आंबाजी सुरवसे (वय ७०, रा. मानेवाडी) यांनी नळदुर्ग पोलीस ठाण्यात फिर्याद दिली आहे. त्यांच्या फिर्यादीवरून आरोपी धुळप्पा महिपती सुरवसे याच्या विरोधात भारतीय न्याय संहिता (BNS) कलम १०३ (१) अन्वये खुनाचा गुन्हा दाखल करण्यात आला आहे. नळदुर्ग पोलीस या घटनेचा अधिक तपास करत आहेत.
