परंडा: शेतातील चिंचेच्या झाडाच्या फांद्या तोडण्याच्या कारणावरून झालेल्या वादातून एका तरुणाला आणि महिलेला जबर मारहाण झाल्याची घटना वडनेर (ता. परंडा) येथे घडली आहे. याप्रकरणी परंडा पोलीस ठाण्यात एकाच कुटुंबातील तिघांवर गुन्हा दाखल करण्यात आला आहे.
याबाबत सविस्तर वृत्त असे की, वडनेर शिवार येथे १५ जानेवारी २०२६ रोजी सकाळी १० वाजण्याच्या सुमारास ही घटना घडली. फिर्यादी संतोष शहाजी खांडेकर (वय २३, रा. वडनेर) हे आपल्या शेतात असताना, आरोपी पप्पुलाल जरीचंद लाडे, रेश्मा पप्पुलाल लाडे आणि जरीचंद लाडे (सर्व रा. वडनेर) यांनी चिंचेच्या झाडाच्या फांद्या तोडण्याच्या कारणावरून वाद घालण्यास सुरुवात केली.
या वादाचे रूपांतर हाणामारीत झाले. आरोपींनी संतोष खांडेकर यांना शिवीगाळ करत लाथाबुक्यांनी आणि दगडाने मारहाण केली, ज्यामुळे ते गंभीर जखमी झाले. तसेच, यावेळी उपस्थित असलेल्या साधना शहाजी खांडेकर यांनाही आरोपींनी शिवीगाळ करून मारहाण केली आणि जिवे मारण्याची धमकी दिली.
या प्रकरणी संतोष खांडेकर यांनी १८ जानेवारी २०२६ रोजी परंडा पोलीस ठाण्यात फिर्याद दिली. त्यावरून पोलिसांनी पप्पुलाल लाडे, रेश्मा लाडे आणि जरीचंद लाडे यांच्या विरोधात भारतीय न्याय संहिता (BNS) कलम ११८(२), ११८(१), ११५(२), ३५२, ३५१(२) आणि ३(५) अन्वये गुन्हा दाखल केला आहे. पुढील तपास परंडा पोलीस करत आहेत.
