धाराशिव: रुईभर (ता. व जि. धाराशिव) येथील श्री दत्त मंदिर संस्थान येथे येत्या 20 फेब्रुवारी 2026 रोजी सकाळी 10 वाजता अत्यंत भक्तिभावात व वैदिक मंत्रोच्चारात भव्य कलशारोहण सोहळा संपन्न होणार आहे. या पावन सोहळ्यास प.प. श्री विद्या नरसिंह भारती स्वामीजी (करवीर पीठ) यांच्या शुभ करकमलांचा आशीर्वाद लाभणार असून, प.पू. श्री दत्त महाराज रुईकर आप्पा बाबा यांच्या मार्गदर्शनाखाली हा उत्सव साजरा केला जाणार आहे.
कलशारोहणाच्या अनुषंगाने 13 ते 19 फेब्रुवारी 2026 या कालावधीत विविध याग-यज्ञ व धार्मिक विधींचा सप्ताह आयोजित करण्यात आला आहे. याच काळात दररोज दुपारी 2.30 ते सायंकाळी 6 वाजेपर्यंत श्रीमद्भागवत सप्ताह भक्तांसाठी खुला राहणार आहे.
कार्यक्रमांचा भक्तिमय क्रम पुढीलप्रमाणे:
- 12 फेब्रुवारी (गुरुवार): अग्निस्थापना, श्री गणेश याग
- 13 फेब्रुवारी (शुक्रवार): श्री दत्त याग, भागवत सप्ताह प्रारंभ, नारायणी, सुदर्शन व धन्वंतरी याग
- 14 फेब्रुवारी (शनिवार): मृत्युंजय याग, श्री दत्त याग, कमलपुष्प अर्चना, महाआरती
- 15 फेब्रुवारी (रविवार): शिवरात्री निमित्त विशेष पूजन व नियमित धार्मिक कार्यक्रम
- 16 फेब्रुवारी (सोमवार): रुद्र याग, श्री दत्त याग, महाआरती व महाप्रदक्षिणा
- 17 व 18 फेब्रुवारी: विविध श्री दत्त याग व साधना
- 19 फेब्रुवारी (गुरुवार): भागवत सप्ताह समाप्ती, ग्रंथदिंडी मिरवणूक, सकाळी 9 वाजता हेलिकॉप्टरद्वारे पुष्पवृष्टी, तसेच श्री दत्त दरबार संगीत सेवा
- 20 फेब्रुवारी (शुक्रवार): कलशारोहण महोत्सव, संतांचे आशीर्वाद व महाप्रसाद; हत्तीवरून साखर वाटपाने कार्यक्रमाची सांगता
या संपूर्ण सप्ताहात रुईभर व परिसर भक्तिरसात न्हाऊन निघणार असून, भाविकांनी मोठ्या संख्येने उपस्थित राहून श्री दत्तगुरूंच्या कृपेचा लाभ घ्यावा, असे आवाहन श्री दत्त मंदिर संस्थानच्या वतीने करण्यात आले आहे.
