तुळजापूर: रस्त्यात सोन्याचे बिस्कीट सापडल्याचा बनाव करून आणि खोटे बिस्कीट देऊन एका साठ वर्षीय वृद्ध महिलेचे ९० हजार रुपये किमतीचे खरे दागिने लांबवल्याची धक्कादायक घटना तुळजापूर येथील जुन्या बसस्थानक परिसरात घडली आहे. या प्रकरणी दोन अज्ञात भामट्यांवर तुळजापूर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पार्वती कृष्णकुमार राठोड (वय ६० वर्षे, रा. गोकुळ नगर, सैफुल, जि. सोलापूर) या गुरुवार, दि. २६ मार्च रोजी सकाळी साडेआठ वाजेच्या सुमारास तुळजापूर येथील जुन्या बसस्थानक परिसरातून जात होत्या. यावेळी दोन अनोळखी व्यक्ती त्यांच्याजवळ आले. या भामट्यांनी आपल्याला १० तोळ्यांची दोन सोन्याची बिस्किटे सापडल्याचा खोटा बनाव केला.
त्यानंतर त्यांनी पार्वती राठोड यांना आमिष दाखवून त्यातील एक खोटे सोन्याचे बिस्कीट त्यांना दिले आणि त्या बदल्यात पार्वती यांच्या गळ्यातील दोन तोळ्यांचे सोन्याचे मिनी गंठण (अंदाजे किंमत ९० हजार रुपये) काढून घेतले. हा व्यवहार झाल्यावर ते दोन्ही भामटे तेथून पसार झाले.
आपल्याला मिळालेले बिस्कीट खोटे असून आपली फसवणूक झाल्याचे लक्षात आल्यानंतर, पार्वती राठोड यांनी तात्काळ तुळजापूर पोलीस ठाण्यात धाव घेतली. त्यांनी दिलेल्या फिर्यादीवरून पोलिसांनी दोन अनोळखी आरोपींविरुद्ध भारतीय न्याय संहिता (BNS) कलम ३१८(४) आणि ३(५) अन्वये गुन्हा नोंदवला आहे. सध्या पोलीस या परिसरातील सीसीटीव्ही आणि इतर माहितीच्या आधारे या भामट्यांचा शोध घेत आहेत.
