परंडा: ‘माझी आई आजारी आहे, तिला मदतीची गरज आहे’ असे सांगून घरकामाच्या बहाण्याने एका १७ वर्षीय अल्पवयीन मुलीवर लैंगिक अत्याचार केल्याचा अत्यंत संतापजनक प्रकार परंडा तालुक्यात उघडकीस आला आहे. याप्रकरणी पीडित मुलीच्या आजोबांनी दिलेल्या फिर्यादीवरून परंडा पोलीस ठाण्यात एका तरुणाविरुद्ध ‘पोक्सो’ (POCSO) कायद्यांतर्गत गुन्हा दाखल करण्यात आला आहे.
पोलीस सूत्रांनी दिलेल्या माहितीनुसार, पीडित मुलगी ही १७ वर्षे ८ महिने वयाची असून तिची ओळख गोपनीय ठेवण्यात आली आहे. मे २०२५ ते २१ जून २०२५ या कालावधीत ही धक्कादायक घटना घडली. एका तरुणाने पीडितेला “माझी आई आजारी आहे, घरकामासाठी मदत कर” असे भावनिक कारण सांगून आपल्या घरी नेले. मदतीच्या बहाण्याने तिथे नेल्यानंतर आरोपीने या अल्पवयीन मुलीवर लैंगिक अत्याचार केले.
या भयंकर प्रकाराची माहिती समोर आल्यानंतर, पीडितेच्या आजोबांनी गुरुवारी, २६ मार्च २०२६ रोजी परंडा पोलीस ठाण्यात धाव घेत तक्रार दिली. त्यांच्या प्रथम खबरीवरून (FIR) पोलिसांनी आरोपी तरुणाविरुद्ध भारतीय न्याय संहिता (BNS) कलम ६४(२)(एफ)(एम) सह बालकांचे लैंगिक अत्याचारापासून संरक्षण (POCSO) कायद्याचे कलम ४, ६, ८ आणि १२ अन्वये गंभीर गुन्हा नोंदवला आहे. या प्रकरणाचा पुढील तपास परंडा पोलीस करत आहेत.
टीप: (कायदा आणि सर्वोच्च न्यायालयाच्या मार्गदर्शक तत्त्वांनुसार अशा प्रकरणांमध्ये पीडितेची आणि तिच्या गावाची ओळख उघड होऊ नये याची काळजी बातमीत घेण्यात आली आहे.)
