तुळजापूर: श्री क्षेत्र तुळजाभवानी मंदिर परिसरात दर्शनासाठी आलेल्या महिला भाविकाची पर्स आणि दागिने चोरण्याचा प्रयत्न सुरक्षारक्षकांच्या सतर्कतेमुळे उधळून लावण्यात आला आहे. निंबाळकर दरवाजा ते राजे शहाजी महाद्वार परिसरातील पाटीलवाडा येथे ही घटना घडली असून, चोरीचा प्रयत्न करणाऱ्या महिलेला रंगेहात पकडून पोलिसांच्या स्वाधीन करण्यात आले आहे.
पुण्यातील लोणी काळभोर येथील रहिवासी असलेल्या सुरेखा वाडकर या महिला भाविक मंदिरात दर्शनासाठी आल्या होत्या. यावेळी सरोज पवार नामक महिलेने त्यांच्या जवळील पर्स आणि दागिने हातचलाखीने चोरण्याचा प्रयत्न केला. मात्र, त्याच ठिकाणी कर्तव्यावर असणारे मंदिर संस्थानचे सुरक्षा रक्षक प्रतीक धनके आणि लहू बोंदर यांचे लक्ष तिच्याकडे गेले. सरोज पवार हिच्या संशयास्पद हालचाली लक्षात येताच त्यांनी तत्काळ धाव घेत तिला चोरी करताना रंगेहात पकडले.
सुरक्षा रक्षकांनी या महिलेला तातडीने मंदिर परिसरातील पोलीस चौकीचे सहायक पोलीस निरीक्षक अर्जुन चौधर यांच्या ताब्यात दिले. पोलिसांकडून तिची प्राथमिक चौकशी करण्यात आली असून, पुढील कायदेशीर कारवाईसाठी तिला तुळजापूर पोलीस स्टेशन येथे पाठविण्यात आले आहे.
या संपूर्ण कारवाईदरम्यान सहायक सुरक्षा निरीक्षक श्रीकांत पवार, प्रतीक दिवाणजी, सुरक्षा पर्यवेक्षक बिभीषण माने, योगेश फडके यांच्यासह मंदिर संस्थानचे इतर सुरक्षा कर्मचारी उपस्थित होते. सुरक्षा यंत्रणेने दाखवलेल्या या तत्परतेमुळे भाविकांमधून समाधान व्यक्त केले जात असून, मंदिर परिसरातील सुरक्षेवर विश्वास दृढ झाला आहे.
