वाशी : येथील सेरेंटिक रिन्युएबल इंडिया प्रायव्हेट लिमिटेड कंपनीच्या पवनचक्की प्रकल्पातील वीजवाहिनीच्या ॲल्युमिनियम तारा अज्ञात चोरट्यांनी चोरून नेल्याचा धक्कादायक प्रकार उघडकीस आला आहे. या घटनेत १० लाख ३३ हजार रुपयांच्या तारा चोरीला गेल्या असून, या तोडफोडीत कंपनीचे तब्बल ८७ लाख १३ हजार रुपयांचे नुकसान झाले आहे. याप्रकरणी गुरुवारी (ता. २) वाशी पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २९ सप्टेंबर २०२५ ते १३ फेब्रुवारी २०२६ या कालावधीत वाशी परिसरातील पवनचक्की प्रकल्पावर ही मोठी चोरी झाली आहे. सेरेंटिक रिन्युएबल इंडिया प्रा. लि. कंपनीच्या पवनचक्कीच्या उभ्या पोलवरील ३३ केव्ही इलेक्ट्रिक डॉग लाईनची (१०३ स्क्वेअर एमएम) तब्बल ३७ हजार ६०० मीटर लांबीची ॲल्युमिनियम तार आणि पँथर लाईनची (२५३ स्क्वेअर एमएम) १७ हजार ८ मीटर लांबीची ॲल्युमिनियम तार अज्ञात व्यक्तींनी कापून चोरून नेली.
या धाडसी चोरीत एकूण १० लाख ३३ हजार ९६२ रुपये किमतीचा मुद्देमाल चोरीला गेला आहे. विशेष म्हणजे, चोरट्यांनी या तारा चोरून नेताना पवनचक्कीवरील इतर ॲल्युमिनियम तारांचे आणि इन्सुलेटरचे मोठ्या प्रमाणावर नुकसान केले आहे. या नुकसानीचा आकडा तब्बल ८७ लाख १३ हजार ८३४ रुपये इतका असल्याचा अंदाज कंपनीने वर्तवला आहे.
याप्रकरणी कंपनीचे प्रतिनिधी रोहित शंकर नेटके (रा. भिसरे, ता. करमाळा, जि. सोलापूर, ह. मु. विकास नगर, धाराशिव) यांनी गुरुवारी (ता. २ एप्रिल) वाशी पोलिस ठाण्यात प्रथम खबर दिली. त्यांच्या फिर्यादीवरून पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३०३ (२), ३२४ (५) अन्वये गुन्हा नोंदवला आहे. एवढ्या मोठ्या प्रमाणावर झालेल्या चोरीमुळे आणि नुकसानीमुळे खळबळ उडाली असून, वाशी पोलिस या प्रकरणाचा अधिक तपास करत आहेत.
