नळदुर्ग : तुळजापूर तालुक्यातील निळेगाव शिवारातील एका शेतातून तब्बल २८ हजार रुपये किमतीची केबल चोरीला गेल्याची घटना उघडकीस आली आहे. याप्रकरणी नळदुर्ग पोलीस ठाण्यात दोन संशयित आरोपी व त्यांच्या साथीदारांवर गुन्हा दाखल करण्यात आला आहे.
पोलिसांनी दिलेल्या माहितीनुसार, प्रकाश दशरथ जमादार (वय ४७, रा. निळेगाव, ता. तुळजापूर, जि. धाराशिव) यांनी याप्रकरणी फिर्याद दिली आहे. त्यांच्या निळेगाव शिवारातील शेतातून ३ एप्रिल रोजी रात्री ८ वाजेच्या सुमारास अज्ञातांनी ११२५ फूट लांबीची केबल (अंदाजे किंमत २८,१२५ रुपये) चोरून नेली. याप्रकरणी प्रकाश जमादार यांनी शनिवारी (ता. ४ एप्रिल) नळदुर्ग पोलिसांत तक्रार दिली. त्यांच्या प्रथम खबरीवरून बबन चंदर काळे आणि सागर जयराम भोसले (दोघे रा. डिकमल पारधी पिढी, धाराशिव) व त्यांच्या इतर साथीदारांविरुद्ध भारतीय न्याय संहिता (BNS) कलम ३०३(२) आणि ३(५) अन्वये गुन्हा नोंदवण्यात आला आहे. पुढील तपास नळदुर्ग पोलीस करत आहेत.
ट्रान्सफॉर्मरची तोडफोड करून ५५ लाखांचे नुकसान; दोन लाखांचे साहित्य चोरीला
वाशी : वाशी तालुक्यातील सरमकुंडी, दसमेगाव आणि कनेरी शिवारात एका कंपनीच्या ट्रान्सफॉर्मरची तोडफोड करून तब्बल ५५ लाख रुपयांचे मोठे नुकसान केल्याची आणि दोन लाखांहून अधिक किमतीचे साहित्य चोरून नेल्याची धक्कादायक घटना समोर आली आहे. याप्रकरणी वाशी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, रोहित शंकर नेटके (वय ३४, रा. भिसरे, ता. करमाळा, जि. सोलापूर, ह.मु. विकास नगर, धाराशिव) यांनी याप्रकरणी फिर्याद दिली आहे. सरमकुंडी, दसमेगाव व कनेरी शिवारात सेरेंटिका रिन्यूएबल इंडिया ४, ५ प्रा. लि. कंपनीचे काम सुरू आहे. १२ डिसेंबर २०२५ ते २४ मार्च २०२६ या कालावधीत अज्ञात चोरट्यांनी या ठिकाणचे वायंडिंग वायर, इलेक्ट्रिक रॉड, सीएसएस रॉड, बस बार, तांब्याचे इलेक्ट्रिक रॉड आणि १२०० लिटर ट्रान्सफॉर्मर ऑइल असा एकूण २ लाख ९ हजार रुपयांचा माल चोरून नेला.
तसेच, चोरट्यांनी ट्रान्सफॉर्मरवरील एम.एस. प्लेट, बॉक्स, सीएनएस आणि पॅनल तोडून व फोडून कंपनीचे अंदाजे ५५ लाख रुपयांचे नुकसान केले आहे. याप्रकरणी रोहित नेटके यांनी शनिवारी (ता. ४ एप्रिल) वाशी पोलीस ठाण्यात धाव घेत तक्रार नोंदवली. त्यांच्या फिर्यादीवरून अज्ञातांविरुद्ध भारतीय न्याय संहिता (BNS) कलम ३०३(२) आणि ३२४(५) अन्वये गुन्हा नोंदवण्यात आला आहे. या मोठ्या चोरीचा व तोडफोडीचा अधिक तपास वाशी पोलीस करत आहेत.
