ढोकी : शेताच्या बांधावरील काट्या उचलत असल्याच्या कारणावरून एका ५५ वर्षीय शेतकऱ्याला कुऱ्हाडीच्या दांड्याने व लाथाबुक्क्यांनी बेदम मारहाण करून गंभीर जखमी केल्याची घटना बुकनवाडी (ता. धाराशिव) येथील शिवारात घडली. ‘पुन्हा शेतात दिसला तर जिवे ठार मारीन,’ अशी धमकीही यावेळी देण्यात आली. याप्रकरणी रविवारी (ता. ५) ढोकी पोलिस ठाण्यात एकाविरुद्ध गुन्हा दाखल करण्यात आला आहे.
अंकुश संभाजी दाणे (वय ५५, रा. पळसप, ता. जि. धाराशिव) असे मारहाणीत गंभीर जखमी झालेल्या फिर्यादी शेतकऱ्याचे नाव आहे. त्यांनी दिलेल्या तक्रारीवरून हेमंत मुरलीधर चव्हाण (रा. म्होतरवाडी, ता. जि. धाराशिव) याच्याविरुद्ध गुन्हा नोंदवण्यात आला आहे.
पोलिसांनी दिलेल्या माहितीनुसार, मंगळवारी, २४ मार्च रोजी सकाळी दहा वाजेच्या सुमारास बुकनवाडी येथील गट क्रमांक १८० मधील शेतात ही घटना घडली. फिर्यादी अंकुश दाणे आणि त्यांची पत्नी हे दोघे शेताच्या बांधाजवळील काट्या (काटाड्या) उचलत होते. यावेळी आरोपी हेमंत चव्हाण याने तिथे येऊन दाणे दांपत्याला शिवीगाळ करण्यास सुरुवात केली. तसेच लाथाबुक्क्यांनी मारहाण करत कुऱ्हाडीच्या दांड्याने मारहाण केली. यात अंकुश दाणे हे गंभीर जखमी झाले. जाताना आरोपीने ‘पुन्हा शेतात दिसला तर जिवे ठार मारीन,’ अशी धमकी दिली.
या घटनेनंतर अंकुश दाणे यांनी रविवारी (ता. ५ एप्रिल) ढोकी पोलिस ठाण्यात जाऊन रीतसर तक्रार दिली. त्यांच्या या प्रथम खबरीवरून आरोपी हेमंत चव्हाण याच्याविरुद्ध भारतीय न्याय संहिता (BNS) कलम ११८(२), ११८(१), ३५१(२)(३) व ३५२ अन्वये गुन्हा दाखल करण्यात आला आहे. या प्रकरणाचा पुढील तपास ढोकी पोलिस करत आहेत.
